Hulgan lang og P1?

"Good AM. Naa diri sa among dapit sa Ermita matang sa salida nga kun gusto kong motan-aw hulgan lang og P1.00 para mo-play ug mo-open ang TV. Ang nakapait kay naay mga law-ay nga scenes nga not suitable for children. Public man god kaayo ni. Unta maaksiyonan ni." -- 0910-7594202

Aron maaksiyonan dayon kini, labing maayo nga magpadangat kamo’g reklamo ngadto sa barangay.

Mas maayo kun makatudlo kamo’g espisipikong lokasyon kun haing dapita sa Ermita kanang giingong hulgan lang og P1.00 unya mosalida na ang TV nga dunay law-ay nga mga eksena nga makita.

Buhata kini ninyo sa labing daling panahon.

* * *

"Good morning, Sir. Ang ospital diri sa Mandaue dugay na gyod nga wa mosuweldo. Kadtong ilang gidawat nga empleyada sa hospital sugod niadtong Agosto, 2008 kun mangayo og clearance kay moundang nag trabaho dili pa gyod tagaan sa personnel. Pugngan pa ra ba gyod sa supervisor." -- 0916-4954963 (Sent: 07:13:38am--November 15, 2008)

Manghinaot ta nga inigkapatik ning maong text nasuweldohan na ang mga trabahante sa usa ka ospital diha sa Mandaue.

Haskang paita! Maayo lang kadtong mga empleyado nga arang-arang nang daan ang kahimtang kay maka-survive. Pero kadto intawong nagsalig lang sa ilang suweldo sa panarbaho alang sa ilang ibuhi sa ilang pamilya luoy kaayo. Unsaon na lang!

* * *

"Sir, maayong adlaw. Di gyod sakto ang gipakanaog nga rollback sa plitehan kay gamay ra kaayo. Kun ako’y pabut-on, dili sa ingon nga nidapig ko sa mga pasahero, P2 unta ang ipatuman nga us-os sa plitehan. Tungod sa palpak sa LTFRB ang driver ug pasahero maoy maglalis tungod lang sa 50 sentabos nga rollback." -- 0919-4866560

Uyon ko sa panahom mo, higalang texter. Gamay ra gyod tinuod kaayo ang 50 sentabos nga us-os sa plite. Morag dili gyod nato ma-feel ang epekto niini.

Ang 50 sentabos nga rollback dili gani makapakonsuylo sa mga bugo!

* * *

 (Sumbong ug reklamo? Text sa 0910-8105522).