Maayo ba nga mag-advance thinking kita?

Maayo gyod sa tawo nga mag-advance thinking ilabi na karong panahona nga lisod na kaayo ang panahon.

Unsa may buot ipasabot sa advance thinking? Ang buot ipasabot niini mao nga kinahanglan nga hunahunaon nato kun unsay posibleng mahitabo nga daotan sa umaabot.

Pareha niadtong nahitabong sunog sa Lapulapu City diin tulo intawon ka mga batang managsoon ang nangapaig kay nahulog ang kandila nga gidagkotan ug wala na sila makagawas sa ilang balay kay gitrangkahan man kini og maayo sa ilang inahan.

Miresulta kini sa pagkapaig sa tulo ka mga bata. Wala hunahunaa sa inahan sa makadaghan kun iyang trangkahan og maayo ang ilang balay mangababoy ug mangamatay ang iyang mga anak kun dunay sunog nga mahitabo.

Dili man daotan kun magkuyog-kuyog sa bana kun mamasahero kay panginabuhi man kini apan hunahunaon usab sa makadaghan nga luwas o safety ang ilang mga anak nga nahibilin sa ilang panimalay.

Naglikay-likay sa kawatan ug tulisan apan didto sa hinoon tugpa sa kalayo nga labaw pang kriminal sa nahauna.

Ikaduha, dugay nang gisigihan og balita nga ang 'cellphone snatching' rampant kaayo apan daghan lang gihapon karon ang magsige og kupot sa cellphone kun maglakaw sa atong mga kadalanan ug magsakay sa jeep de pasaheroan. Magpabilib gyod sa publiko nga aduna kunoy cellphone sila.

Ikatulo, daan nang nahibaloan nga kun mo-overheat ang tv o vcd kun dugay'ng pagngon kay moresulta kini sa sunog, daghan lang gihapon karon ang walay limit sa oras sa pagtan-aw sa nahisgotang mga appliances.

Daghan nang mga sunog ang nahitabo gumikan sa 'overheating' sa mga appliances karong panahona.

Busa, kinahanglan gyod nga mag-una ang atong mga pangagpas kon 'advance thinking' sa umaabot nga panahon!

Di ba?