Niining bahina sa akong lindog, maoy una kong hisgotan ang bahin sa tigbakay. Nakadawat ko’g mga text nga nagbutyag nga sa lainlaing dapit sa dakbayan sa Sugbu, naay nagpasiugda og tigbakay. Usa na niini ang Banilad.
Usa ka texter nag-ingon: “Good day, Sir. Bahin ni sa tigbakay diha sa may Banilad. Nahitabo ni dili layo sa may NFA, naay dalan diha nga gamay luyo og diyotay sa Red Cross. Naa gyu’y ruydahan diha. Ug ang polis igo ra mo-park og kadiyot sa may NFA dapit. Unya naay mogawas nga tawo ug moduol sa polis. Pagkataudtaod, mawala ra ang polis.” -- 0919-7618342
Kun maoy atong tuohan ang pamahayag sa atong texter, makaingon ta nga dunay polis nga nakigkunsabo o kaha nagprotehir nianang giingong tigbakay sa Banilad.
Espoko mo ba nga nagtukod na man og ruydahan ang nagpasiugdag tigbakay nianang maong dapit? Nga sa ato pa, dayag na kaayo ang pagpahigayon og tigbakay diha, wala nay kalainan sa usa ka buwangan. Pastilan!
Ang tigbakay usa ka illegal nga kalihokan base sa Presidential Decree no. 449. Maayo unta kun masubay ni sa mga barangay opisyal sa Banilad ug maronda sab kini sa kapolisan.
Palihog, aksiyoni!
* * *
“Good AM, Sir. Ang among polis diri sa Baraka, Carcar dili gyud manakop sa jai-alai masiao. Tungod seguro kay magdawatan pud sila gikan sa financier.” -- 0926-9907115
Kun tinuod nga wala mabadlong ang kalihokan sa illegal nga sugal sama sa masiao ug jai-alai diha sa Baraka, Carcar, dili gyud ika-discount ang posibilidad nga nasubornohan ang mga tigpatuman sa balaod.
* * *
“Naay konsehal sa Tayud, Consolacion nga modiretso lang og pangulata sa mga batan-on. Maayo unta ma-imbestigar ni sa Ombudsman.” -- 0920-7176581
Pasakai ninyo’g reklamo ang maong konsehal ngadto sa buhatan sa Ombudsman aron siya ma-imbestigar. Kana ang proseso.
* * *
(Sumbong ug reklamo? Text sa 0910-8105522).