Milagro nga maisip ni Arsobispo Ricardo Cardinal Vidal ang pagpadayon ni Presidente Gloria Arroyo sa katungdanan luyo sa mga tinguha pagpalagpot sa nauwahi sa katungdanan. Di’ lang ang Cardinal ang nagtuo nga milagro ang naka-ingon nganong nagpabilin ang presidente sa pwesto tungod kay mismo mga kritiko sa administrasyon nahibu’ng usab unsay ana-a sa presidente nganong wa’ pa ni matangtang sa iyang katungdanan. Bisan pa kung tinuig nga gipasakaan og kasong impeachment ang presidente, kanunay ning makalingkawas sa mga pasangil. Pabor man o di’ sa unsay legal, sakto man o sayop ang pamaagi aron magpadayon siya sa katungdanan, dayag man o gitago sa publiko ang mga paagi aron lang mahuman ang iyang administrasyon, di’ na ang mahinungdanon alang sa uban. Kung si Cardinal Vidal ang pangutan-on, milagro ang tanan.
Milagro ba nga matawag bisan kung nahibawo na tang tanan nga may kalapasan nga nahimo? Nganong gitugot sa kahitas-an ang giingong milagro bisan pa sa matod pa kahiwian nga nahimo sa usa ka tawo? Simple ang tubag sa Cardinal, adunay mga higayon sa atong kinabuhi nga gitugot sa kahitas-an ang tanan, bisan ang dautan, bisan ang kahiwian, bisan ang ilegal, aron lang makat-on tang tanan sa unsay di’ maayo. Gitataw sa Cardinal, bisan ang kamatayon nga mahitabo sa usa ka tawo sa bangis nga paagi, makapangutana ta, nganong gitugot ang tanan sa kahitas-an.
Sama ra nga mokwestyon sab ta sa trahedya ug uban pang pait nga insidente nga mokalas sa gatusan ka mga kinabuhi. Ang tanan, adunay hinungdan ubos sa mando ug pag-abot sa tawo nga makagagahom. Milagro nga maisip nga madawat ang kamatuoran, nga bukas ang imong kaugalingon sa pait nga pagsuway ug milagro kung hingpit nimong mausab ang direksyon sa imong kinabuhi o sa imong mga desisyon human ang usa ka di’ maayong kasinatian nga nasinati. Milagro nga matawag kung sa sunod nga piniliay may katakos ka mopili sa mas tukmang lider, nga mobarug ka sa kamatuoran, nga mosuporta ka bisan sa di’ kasarangan nga prinsipyo, nga mopaluyo ka sa mga tawo nga nahibawo kang imposibleng modaog apan dako ang posibilidad nga maoy magbukas og kabag-ohan sa atong komunidad. Isalig ang tanan sa milagro.
Nagtapok sa usa ka bukirang bahin sa syudad sa Talisay. Sentro sa ilang diskusyon unsaon nga makasugakod gikan sa grabeng epekto sa krisis sa ekonomiya. Nagkada-iyang diskarte ang gihimo sa uban aron lang may sarang ikagasto sa inadlaw-adlaw nilang panginahanglan. Alang nila, milagro nalang kung makasugakod sila sa krisis nga nasinati karon. Gitawag nilang milagro ang maka-kaon katulo sa matag adlaw ug matubag ang uban pang mga panginahanglan. Alang sa simpleng mga Pinoy, isalig ang tanan sa kahitas-an tungod kay adunay mga butang sa kinabuhi o mga pagsuway nga moabot sa usa ka tawo o nasud nga di’ na mada’g tawo lang ang mangita og solusyon. Isalig ang tanan sa milagro.
Nagkisi-kisi karon ang mga adunahang nasud sa kalibutan unsaon nga mahibalik sa normal ang dagan sa ekonomiya. Kung ang mga ekonomista ang pangutan-on, wa’ pa moabot ang mas grabeng igo sa krisis sa ekonomiya. Gipanlantaw nga su’d ning tuiga hangtud sunod tuig ang pagpaak sa epekto sa krisis. Wa’ ba maisip sa mga dagkong lider sa kalibutan nga ang problema nga gisagubang karon nagsugod sa ilang pagkahakog ug pagkataas sa ilang garbo? Wa’ ba makahinuklog ning mga tawhana nga ang krisis sa kalibutan karon, nagsugod sa ilang hakog nga pagpadagan sa mga dagkong negosyo sa kalibutan. Ug wa’ ba masu’d sa huna-huna ning mga lider nga basin nagkinahanglan na og pagpanghilabot sa kahitas-an ang tanan aron makasugakod sa grabeng kalisud. Wa’ ba maisip sa mga lider sa kalibutan nga adunay panahon sa kinabuhi nga gikinahanglan di’ lang ka mobarug apan may mga higayon nga moluhod ka aron imong mahibaw-an unsay kalainan sa ana-a sa taas itandi sa unsa ang ana-a sa ubos. Isalig ang tanan sa milagro.
Milagro na kung matawag kun makalingkawas pa ta sa grabeng pagsuway sa ekonomiya. Labaw pang milagro kung moduol ang tanan sa kahitas-an atol ning mga adlaw sa grabeng pagsuway. Sakto ang Cardinal sa iyang pahayag nga usahay itugot sa kahitas-an ang mga pagsuway aron lang mahinumdum ta sa iyang kagamhanan, aron mahibawo ta nga wa’y imposible sa iyang paghigugma ug aron atong mahatagan og katumanan ang iyang saad sa pag-amoma kanato bisan pa kung ato na siyang gisalikway sa makadaghang higayon. Basin kung sa pag-ampo ang mga paningkamot aron makalingkawas sa grabeng kalisud ug aron atong masulti sa atong kaugalingon nga usahay sa atong pagpuyo mas maayong isalig ang tanan sa milagro.