"Good day, Sir. Kanang mga manindahay og fruit juices diha sa merkado sa Mandaue nigamit man sila’g magic sugar. Makadaot ba na. Gusto lang kong ma-aware ta ini kay kasagaran ra bang mopalit diha mga bata." -- 0907-2795643
Daghan salamat sa imong pagpakabana, higalang texter. Husto ka. Wala gyud i-rekomendar ang paggamit sa magic sugar kay namatud-an sa usa ka pagtuon nga dili kana makahatag og kaayohan sa lawas.
Dugay nang giawhag ang dili paggamit og magic sugar diha sa mga pagkaon ug ilimnon. Hinaot nga ma-aware sab niini ang mga pumapalit ug ang mga manindahay og pagkaon ug ilimnon.
* * *
"Good day. Usa ko ka security guard. Naa lang ko’y sugyot nga dili untang mga polis nga nagdumala sa mga security agencies, ila untang hatagan og mandatory requirement ang tag-iya sa ahensiya. Angay unta nga ang mga security agencies dili na moisyu og armas nga .38 caliber. Naay ubang .38 caliber giisyu way firing pin. Mao na nga di mobuto. Mao nay hinungdan nga mga guwardiya manago kun naay tulis kay wa man sila’y ikasukol. Tinuod gyud ang naay gubaon nga mga armas nga giisyu ngadto sa mga guwardiya." -- 0929-6207522
Kun tinuod kining gibutyag sa atong texter, klaro nga nidawat lang og limpiyo ang mga tag-iya’g security agencies ug wala sila maghikutar sa ilang mga guwardiya. Sama ra sa gilawog nila sa tirong ang ilang mga guwardiya nianang kalakiha. Tiaw bay isyuhan lang og armas nga dili mobuto? Maayo pa diay ang mga gun replica nga gibaligya sa mga aseras kay mopaka pa kun kabliton ang gatilyo! Pait!
Buyno, angay konsiderahan sa mga nahingtungdan kining sugyot sa atong texter.
* * *
"Mangutana lang mi, Sir, kun unsay pamaagi diha sa Simbahan sa Regla sa Lapulapu City kabahin anang maninda og kandela. Kami taga probinsiya moanha diha managkot. Maglibog mi kay mopalit mig P5 nga kandila, paghuman namo’g sayaw, naa may maningil og dako mi’g mabayran." -- 0908-6712428
Dili ko makahatag og categorical nga tubag bahin niini. Mas maayo nga ang tagdumala sa simbahan maoy mopasabot niini.
* * *
(Sumbong ug reklamo? Text sa 0910-8105522).