Tungod sa kadaghan na nila gikinahanglan na gayod nga i-regulate ug kontrolahon na ang habal-habal. Tungod sa ilang gidaghanon daghan na usab nga mga kaso sa aksidente sa kadalanan ug mga krimen nga nahitabo diin nalambigit ang mga habal-habal driver.
Kaniadtong miaging semana nadakpan sa mga police dinhi sa dakbayan sa Sugbo ang mga habal-habal driver nga mao diay ang mitulis ug mipatay sa usa ka tinun-an nga Iranian. Mao usab kini ang grupo nga mitulis sa usa ka tinun-an sa Bigfoot-Mactan nga sa pagkakaron padayon pang nakigbugno sa iyang kinabuhi sa usa ka tambalanan dinhi sa Sugbo.
Sigon sa akong nakita duna usay daghang mga habal-habal driver nga mga minor de edad nga labing seguro wa gyod ni silay lisensiya sa pagmaneho og motorsiklo. Daghan upod nga habal-habal driver nga mamasahero bisan hubog o nanimahong bino nga naghatag lamang og kapeligro sa kinabuhi sa ilang pasahero.
Si konsehal Jack Jakosalem sa dakbayan sa Sugbo misugyot na sa pag-regulate sa habal-habal pero kun mauyonan man sa konseho ug sa mayor ang regulasyon mapatuman lamang dinhi sa dakbayan sa Sugbo ug dili kini mapatuman sa tibook nasud.
Ang habal-habal nag-operate sa tibook nasud busa mas angayan seguro nga ang moregulate niini mao ang kongreso aron usa lang ang sundon nga regulasyon paglikay sa mga kalibog unya sa pagpatuman niini.
Sugyot nako sa kongreso ug sa konseho sa Sugbu nga dili gyod tugotan nga makamaneho og habal-habal kadtong mga minor de edad ug moinom sa mga ilimnong makahubog. Pangayoan usab og police clearance, NBI clearance ug uban pang papeles nga makapamatuod nga ang aplikante dili kriminal aron luwas ang mga pasahero ug dili maangin kadtong mga but-an nga habal-habal driver niadtong magpakahabal-habal driver nga tulisan.