Lisud likayan ang pagkasayop, apan...

Tungod lagi kay wala may perfect nga tawo, ug tungod kay dili man usab perfect ang kalibutan nga gipapuy-an kanato sa Ginoo, dili kalikayan ang pagkasayop. Mao man gani hinungdan nga tungod sa kadaghang sayop nga nahimo sa tawo, wa gyud mahimutang ang kalibutan. Gubot dinhi, gubot didto. Krisis dinhi, krisis didto; corruption dinhi, corruption didto; Cheating dinhi, cheating didto; lying dinhi, lying didto. Sayop dinhi, sayop didto. Mao kini ang kalibutan. Hinoon, ang uban tinuyoang sayop.

Apan, si Kuya Boy Odilao, adunay solusyon paghimog kasaypanan. Ang iyang text nagkanayon: Never make the same mistakes twice. There so many new ones to make. Try a different one each day.

Morag kataw-anan, apan, may pagka-tinuod. Ngano man tuod nga kaduhaon man nimog sayop. Inigsayop ka usa, paningkamoti nga di na masubli ang mao gihapong sayop. Daghan kaayong sayop ang kalibutan. Lainlaina ang imong sayop matag himo nimog sayop. Siyaro di ka ma-correct inig kadugay.

Niay lain: Thousand of yesterdays are gone, Millions of tomorrow are still to come. But there is only one TODAY.

Ayaw puy-i ang imong kagahapon, ayaw palabig laom sa imong ugma, seguroa ang imong karon. Niay uban nato, nahimong hostage sa ilang kagahapon, maglisud nag lihok alang sa umaabot. Ang uban sad, nagpunay na lag lantaw sa layong unahan, ug makalimot sa ilang karon. Mao nga tungod kay wala silay nahimo sa karon, makalitan sila inig-abot sa ugma, ug lain na usab nga today nga walay nahimo.

Nia pa gyud: Everyday is a miracle, every moment is a grace, every hour is a blessing, every breath is from the Lord. Unya, no one is rich to buy back yesterday. But if you have the character to do better things today, you would be the richest one tomorrow.

Mao ni ang giingon nga ang tanan is a matter of attitude. Sa ato pa, nia ra gyud nato kun unsa ang atong panglantaw sa kinabuhi. Sa giingon, ang matag adlaw usa ka milagro, matag takna usa a grasya ug ang matag ginhawa nagagikan sa Ginoo. Nia ra nato kon motuo ta niini. Ug ang usa ka matarong nga tawo, maisip nga labing adunahan ning kalibutan, daghan kanato nga despite sa nagtipun-og nga bahandi, apan gumikan sa ka dunot sa kasingkasing, giisip nga labing timawa.

Magpasalamat kita kang Kuya Boy Odilao, sa iyang pagpaambit kanato sa makapahinuklog nga mga bulawanong pulong.