Yawan-ong kapildihan

PEBRERO 1, 2009: Ikaupat nga Domingo sulod sa tuig

Mga Pagbasa:  Dt. 1:15-20/1 Cor. 7:32-35/Mk. 1:21-28

Daw sa gibati sa dautan ang kalisang sa dihang ilang nahimamat ang atong Ginoo nga mihingilin kanila gikan sa lawas sa maong tawo. Ning maong milagro giabot sa tumang kahibulong ang mga tawo nga nakasud-ong sa maong hitabo ug nakahaling kini sa hinungdan kun nganong nahimong mas nailado ang atong Ginoo tungod sa iyang binuhatan.

Sa mosugot ta ug sa dili kanunay gyud nga magkabingkil ang pwersa sa maayo ug ang pwersa sa dautan. Nahimo na kining kabahin sa atong pagka-Simbahan nga sa matag karon ug unya gikinahanglan nato ang usa ka makuti ug mapalandongong pagpili. Ang tawo nga mosunod sa dalan nga matarong maoy usa ka pagpili ug ang pagsunod sa dalan sa dautan maoy usa pud ka pagpili. Usahay atong namatikdan nga mas daghan ang mipili sa dautan tungod sa mga hinanaling haylo niini alang sa usa ka katagbawan. Mao nga ang tawo nipili aron mamahimong dautan kay wala man niya matugkad ang halawom nga kahulogan ug implikasyon sa kaayo. Apan dili gyud mahitabo nga magmadaugon ang dautan, ni ang kangitngit batok sa kahayag.

Pangamuyo

Ginoo, tuboran sa gugma ug kaayo, among ihalad kanimo ang kinatibuk-an sa among kaugalingon aron magiyahan mo sa paghimo og mga desisyon. Mas pilion unta namo ang katarong ug amo untang isalikway ang bisan unsang dautan. Ikaw nga buhi ug hari hangtud sa kahangturan. Amen.