Tinuod ba god?

Pwerte na diay’ng daghana nga mga kawani sa private companies nga gipangtaktak sa ilang trabaho tungod sa kalisud karon sa ekonomiya.

Aw hinuon, sa ubang kompaniya sigurado ko nga giuna pagtaktak sa trabaho kadtong mga ligoy, apan dili usab hinuon imposible nga giapil kadtong mga “gaan” ra og backer.

Bisan asa nga trabahoan duna man g’yoy mga ligoy, mga kawani nga dili makatuman sa gitahas kanila sa ilang employers.

Usahay lagi, makapanglingo-lingo ko kay panahon sa pagpangaplay og trabaho, pwerte kaayo nga magpaluoy-luoy apan kun dawaton na, ligoy kaayo.

Hinoon, ang batasan nga ligoy mosamot kini kun ang mga gitudlo nga supervisors, dili usab magtuman sa ilang katungdanan.

Ang nindot g’yod sa usa ka kawani mao ang batasan nga anad sa trabaho ug dili magkwenta sa oras. Ingon ba niana ang imong batasan?

* * *

Gidayeg ni Mayor Tomas Osmeña ang kapolisan ug kabomberohan nga kuno lakip sa “cleanest government office” dinhi sa dakbayan nga minus og korapsyon.

Aw dili na lang ko molalis ni Mayor Osmeña. Atul sa among “conversation” og sa mayor, gipasigarbo kaayo niya ang Cebu City police office ug ang Cebu City fire department.

Nalipay tuod sila si CCPO director Patrocinio Comendador ingon man si Fire Marshall Esmael Codilla.

Gikontak na hinuon nako si higalang Pat Comendador ug giawhag nga pamatud-an ang pagsalig ni Tommy nila. Suot-suota ra god ninyo ang mga dapit diha sa Kamagayan ug Ermita Sir.

Usa ka polis nga higala nako mitug-an nga daghan kaayo mo og masakmit diha sa Kamagayan nga wala lang sakmita sa kapolisan sa Parian, ingon man diha sa Ermita.

* * *

Usa ka “secretary to the mayor” sa Camotes nadakpan sa kapolisan kay nag-operate kuno’g masyaw. Wala na g’yod ko makurat sa maong report.

Dugay na kaayo ko nga nagpahibalo nga ang masyaw wala g’yod mahunong sa probinsya ug bisan dinhi sa dakbayan. Daghan ko og mga kaila nga mireport nga wala g’yod mahunong ang masyaw.

Midayeg kaayo ko ni Koronel Carmelo Valmoria, ang provincial direktor sa kapolisan sa Sugbo kay usa kini sa buotang opisyal nga akong nakaila.

Dili g’yod kini modawat og suborno gikan sa mga tigpasiugda og sugal, sama sa video karera ug masyaw. Apan ang problema kay ang iyang mga sakop sa kalungsuran maoy dili molihok.

Unsa kaha’y sulbad ani nga problema Kernel? Kun ipatawag god nimo ang mga hepe sa kapolisan, moingon ra man nga hinay na ang masyaw sa ilang dapit.

Kinahanglan nga ibalik sa pagpatuman kadtong lagda nga kun ang operating unit gikan gani sa laing lugar ang maka-operate, manubag ang mga local police.

Dili kay igo lang balhinon ang mga hepe nga wala makatuman sa ilang tahas, kinahanglan g’yod nga silotan.

* * *

Ang mga sakop sa Task Force Alpha nagpahigayon kagahapon og seminar aron nga masuheto sila pag-ayo sa mga balaud kabahin sa trapiko.

Kini maoy mogiya kanila sa pagtuman sa ilang katungdanan isip mga deputized agents sa Land Transportation Office (LTO).

Akong awhagon ang mga sakop sa task force nga hugti ninyo paghimo’g kampanya ang mga abusadong drayber, ilabi na sa gabii nga dili magsuga ang uban.

Salamat nila ni Sir Harvey Osmeña ug Joe Mendaros, mga pangulo sa task force nga mipasiugda sa maong kalihukan.

Ang mga sakop sa task force mga negosyante ug mga professional aron nga dili matintal pagdawat og suborno.