Kabag-ohan sa Pinas ug Amerika

Kabag-ohan ang nahimong unod sa mga pamahayag sa bag-ong presidente sa Amerika gikan pa sa iyang pagpangampanya hangtud sa iyang pagdaog ug hangtud nga nanumpa isip ika-44 nga Presidente sa labing adunahan ug gamhanang nasud sa kalibutan. Kinsa’y magtuo nga moabot ang higayon nga kabag-ohan naggikan di’ lang sa usa ka simpleng komunidad sa Estados Unidos, ang kabag-ohan naggikan sa labing taas nga posisyon sa gobiyerno sa maong nasud isip labing una nga African-American President. Ang kabag-ohan buhi sa personalidad ni President Barack Obama kansang kaliwat giisip nga ulipon kaniadto sa usa ka nasud nga nipasigarbo sa demokrasya ug patas nga pagtratar sa tanang tawo.

Makapanlibawot sa balhibo ang panaghiusa sa mga puti ug itom ug uban pang kaliwat nga nabuhi ug nagpakabuhi sa gitawag nga bag-ong ‘promise land’ kon yuta sa mga panaad. Emosyonal ang tanang tawo samtang gipaabot ang pormal nga pagpanumpa sa ilang bag-ong presidente nga giisip nilang moda’ sa ilang nasud gikan sa kalisud balik sa usa ka nasud nga may lig-ong ekonomiya ug mga tawo nga puno sa determinasyon. Makahilak ka magtan-aw nga ang Amerika nga gitamod ug gisaludohan sa uban tungod sa maayong pagpadagan sa ilang gobiyerno, karon gihambin ang tinguha alang sa kabag-ohan.

Makapahinuklog kanato ang mga panghitabo sa Amerika. Kung sila nagpaubos samtang gidawat ang ilang kalisdanan ug pagsuway, unsa na kaha ang mga nasud sama sa Pilipinas nga layo pa ang daganon aron makatupong sa ilang ekonomiya? Kung ang Amerika nangita na og solusyon sa nagkagusbat nilang ekonomiya, nganong hangtod karon padayon man gihapong idlas sa Pilipinas ang kabag-ohan? Kung ang Amerika nanawagan og pagtinabangay ug panaghiusa aron makasugakod sa labing dakong problema sa krisis, nganong sa Pilipinas nagkinahanglan paman ta og laing panagtapok sa Edsa aron atong mahinuklogan ang grabeng problemang gisagubang sa nasud.

Wa’ kang Obama ang kabag-ohan sa Amerika apan anaa sa matag usa kanila nga determinadong may mabuhat aron lang mahaw-as sa grabeng kalisud ang kaniadto adunahang nasud. Wa’ kang Obama ang sinugdanan sa giingong bag-ong nawong sa Estados Unidos apan anaa sa mga tawo nga may hingpit nga respeto sa ilang gobiyerno. Sama ra nga dinhi sa Pilipinas, wa’ kang Presidente Arroyo ang kabag-ohan apan anaa sa mga tawo nga may igong determinasyon ug katakos sa pagtabang. Ang nakapait lang dinhi sa ato, nawad-an na og gana ang katawhan nga motampo sa kauswagan tungod kay nagpabiling dakong problema ang kurapsyon nga sagad sa mga gi-akusahan kaalyado ra sab sa Malacañang.

Kung imong paminawon, susamang tema sa speech ra ang gibatbat ni Obama atol sa iyang inagural rites ug sa gipadayag nga pamahayag ni Presidente Arroyo dihang ni-asumer siya sa pwesto human sa pagpalagpot ni Erap. Makapanlibawot sab sa balhibo ang nahitabo kaniadto kung diin nagkahiusa ang mayoriya sa usa ka tingog sa kabag-ohan. Apan human sa siyam ka tuig, asa naman ang kabag-ohan nga gipangandoy sa katawhan? Ang naani nga dungog mao nga ang Pilipinas ang ikaduha sa labing kurakot nga nasud sa Asya. Ang Pilipinas nga kaniadto gitan-aw sa ubang mga nasud tungod sa malinawon nga rebulosyon karon labaw pa sa kagubot sa lukot ang mga nasugatang problema sa pagpangawkaw o pag-abuso sa katungdanan.

Determinado ang Filipino community sa Amerika nga ilang suportahan ang liderato ni Obama. Alang sa mga Pinoy didto, karon ang tukmang higayon aron mobangon sila uban sa mga Amerikano aron ipadayag sa kalibutan nga wa’y imposible sa nagkahiusa ug nag-inunongay nga katawhan. Pagkanindot paminawon kung susamang pagbati ug determinasyon sab unta ang ipadayag sa mga Pinoy. Managsama sab ang gibati sa mga adunahan ug mga kabus, sa mga tawo sa gobiyerno o sa mga ordinaryong molupyo.

Apan dinhi sa Pilipinas, basin lain na sang Edsa ang paabuton pa aron lang matuman ang pangandoy sa lain na sang kabag-ohan. Moabot nalang ang bag-ong henerasyon, magpabiling idlas ang damgo sa kalamboan alang sa usa ka nasud kansang pagtuo sa kabag-ohan, inanay nang napupos sa mga gipakitang kahiwian sa mga lider ug mga tawo nga may dakong impluwensiya sa atong nasud.