Ang Piyesta Senyor

ENERO 11, 2009: Pangilin ni Senyor Santo Niño

Mga Pagbasa:  Is. 9:1-6/Sal. 98/Ef. 1:3-6,15-18/Mk. 10:13-18

Nahimong kabahin sa atong kinabuhi ug ato nang kinabuhi ingon nga mga Sugbuanon ang Batang Jesus. Siya ang kanunay nga manalipod kanato gikan sa bisan unsang mga katalagman. Kanunay siyang motabang kanato panahon sa atong mga panginahanglan. Apan dunay mga maayong punto sa pamalandong ang atong mapupo sa matag higayon nga mosaulog kita sa iyang pangilin.

Una, nga angay unta natong masayran nga aron kita mohamtong sa atong pagtuo angay natong huptan ang usa ka kinaiya nga iya sa usa ka bata nga naghulagway sa kayano ug sa kamasaligon.

Ikaduha ug mas konkreto nga ang Piyesta Senyor mao untay magdapit kanato nga mohatag og igong bili sa atong mga kabataan aron mamahimo silang mga maayong lungsoranon ug mapuslanong mga tawo alang sa umaabot. Ning paagiha, mas malipay ang mahal nga Senyor. Kaninyong tanan, Pit Senyor!