Imbitasyon sa kapolisan
Semana na kapin sukad sa pagbanhig patay kang Cebu City Assistant Prosecutor Patrick Osorio apan hangtud karon wa pay klarong motibo sa krimin nga nahibaw-an ang mga imbistigador.
Di pa katubag og klaro ang kapolisan kun “work-related” ba o personal ang hinungdan sa pagpatay niya. Si Cebu City Police director Patrocinio Comendador miingon nga singkwenta ngadto sa saysenta porsiyento ang ilang pagduda nga may kalambigitan sa trabaho samtang ang nahabiling 40 porsiyento posible nga personal.
Matud ni Comendador nga diha na silay mga tawo nga giimbitar alang sa imbistigasyon sa pamasin nga duna ni’y kalambigitan o nahibaw-an sa krimin. Apan ang tanan matud niya wa gyuy maayong resulta.
Giklaro sab niya nga wa pa silay suspetsado nga gidakop kun dili pulos lang imbitasyon ang ilang gihimo.
Tungod niini, mitumaw ang mga pangutana: Unsa may kalainan sa imbitasyon sa kapolisan ug sa ilang dakop? Kanus-a man ang usa ka tawo maingon nga dinapit alang sa imbistigasyon ug kanus-a man siya maisip nga dinakpan? Unsay may basihanan sa kapolisan pagdapit ug unsay deperensiya niini sa ilang basihanan pagdakop?
Unsa may kalainan sa ilang dinapit ug dinakpan kun pulos ni gihikawan sa ilang kagawasan nga makabiya sa estasyon sa kapolisan?
Si Comendador miingon nga ang usa ka membro sa Tau Gamma Fraternity nga ilang gikustodiya sukad niadtong Sabado sa hapon hangtud sa Lunes sa hapon igo lang kuno nilang giimbitar.
Si Ritcham Alda giingon nga gikuha ni sa kapolisan didto sa Sitio Bulingit, Mambaling pasado alas kwatro sa hapon niadtong Sabado. Giingon nga gidudahan siya nga responsabli sa pagpatay ni Osorio sanglit nanag-iya ni og puwa nga motor nga susama sa gigamit sa mga mamumuno.
Nakapaduda tungod kay igo ni nga giilisan og itom ang pental. Gawas niini giingon nga duna sab ni’y text ngadto sa usa sa mga tistigo diin iyang giangkon nga sila maoy nagbanhig ni Osorio.
Wa hinuoy napakita nga text kay matud pa na-erase na ang mensahi. Apan gibuhian ra si Alda human matud pa miingon ni nga nagkumedya ra siya sa text ug wa sab makakita og saksi ang kapolisan pagtumbok niya.
Si Comendador miingon nga dili suspetsado si Alda ug igo lang kining giimbistigar. Wa sab kuno siya presoha. Pero unsa may basihanan sa kapolisan pag-imbitar niya kun di siyay suspetsado?
Kun wa sab siya prisoha, nganong gidid-an man siya pagpauli sukad sa Sabado sa hapon hangtud sa Lunes?
Wa ba mapugos lang ang kapolisan pagbuhi niya tungod kay ang saksi nga giingong ilang gipugos sab pagpapirma og affidavit aron itumbok si Alda nga maoy mamumuno nikisikisi man?
Si Elenito “litoy” Cole midangop sa mga sakop sa media tungod kay buot magpatabang aron bakwion ang affidavit nga iyang gipirmahan atubangan sa kapolisan.
Matud ni Cole nga gipun-an ang iyang affidavit aron gyud maapiki si Alda bisan kun wa siya magsulti niini. Bisan kun siya sayod nga di na mao ang affidavit nga iyang gipirmahan, matud ni Cole nga napugos siya pagpirma tungod kay di man siya tugotan nga makapauli.
Si Cole miingon nga gipapirma siya sa affidavit nga nagtumbok ni Alda isip gunman bisan og ang tinuod matud niya nga wa gyud siya makakita sa dagway sa gunman sanglit nagsul-ob kini og helmet.
Matud ni Cole nga gibutang sa affidavit nga gipreparar sa kapolisan nga iyang nakit-an si Alda nga nagbarug-barug didto sa dapit diin mahitabo ang pagpamanhig usa ka oras sa wala pa mahitabo ang krimin.
Kun atong tuohan ang pangangkon ni Cole klarong buot himuong “fall guy” sa kapolisan si Alda. Angayang pasalamatan ni Alda si Cole kay kun wa pa kini mobarug sa kamatuoran hayan napasakaan na siya og kasong murder.
* * *
- Latest
- Trending
