ENERO 4, 2009: Ang Epipaniya sa Ginoo
Mga Pagbasa: G Is. 60:1-6/Ef. 3:2-3,5-6/Mt. 2:1-11
Gikan ako sa Maslog Danao City kay nag-blessing sa balay sa akong kumpare nga si Vincent Mancao sa dihang nisuway ko og para sa taxi paingon sa siyudad. Sa dihang nakasakay na ako, unang misugilon ang drayber nga lingaw kaayo siya og kukabildo sa iyang amigo kalabot sa mga isyong pang-Ginoo. Usa diay siya ka Born-Again Christian nga malipayon kaayong magsugod sa iyang adlaw pinaagi sa pag-ampo uban sa iyang mahal nga kapikas. Mao nga sa dihang iyang nasayran nga ako usa diay ka pari, daw siya nakuratan. Apan ako siyang giingnan: “Ayaw’g kabalaka kay dili nako big deal kun si kinsa ka pa bisan pa og ikaw si Barack Obama basta dili ka lang mangarate kun ugaling magkalisud na diha sa debate.Kay after all, dili pud kaayo ko interesado sa mga debate ni mosing-al sa mga isyung pang-Ginoo aron lang ikapakita nga kuno maayong laki!
Apan kun buot hunahunaon baya, ingon ini ang kinaiya nga gipakita sa kadaghanan kanato karong mga panahona. Particular kaayo kita bulok sa panit sa tawo, ang iyang kulturanhong kagikan ug labaw na tingali ang iyang relihiyosong ekolohiya.
Apan ang tabunok nga mensahe nga nikulit og kalainan sa kinabuhi sa mga Maalamon (Mago) maoy nagdapit kanato sa pagdawat nga ang Dios dili diay Dios sa pipila kundili Dios alang sa tanan. Mao nga dili haom ang pagmontar og mga sukaranan ug mga koral nga maghimo kanatong halayo sa ubang hut-ong sa mga tawo ug kultura ning kalibutan. Kay ang atong kahingpitan baya, nagasukad diha sa atong pakiglambigit sa uban.
Mao nga mapasalamaton ako sa maong taxi driver nga akong nahigala niadtong taknaa ingon man sa mga Baptist, Protestant, Budhist, ug mga Muslim Authors kang kansang mga hunahuna ug pamalandong dako kaayo og kahimoan sa akong mga wali ingon nga Katolikong Pari.