Wa na kaayo'y shabu?

Katoohan g'yod nga minihit na ang suplay sa shabu pagka karon tungod sa pagsaka sa presyo niini sa milabay'ng mga buwan.

Kaniadto sa diha pa ko madistino sa kapolisan, tag P7,000 lang ang bulto sa shabu, kanang lima ka gramo. Apan karon, nagkantidad na kuno og P40,000.

Grabeha ka mahal uy. Ang uban lagi nga mga tiggamitan og shabu, nanambok na kay wala na man sila makagamit. Makaayo hinoon kanila.

Tan-aw nako, mosamot pa gayod nga masumpo o kaha mapaminus ang problema sa illegal nga drugas kun ang mga opisyal sa kabarangayan moabag sa kampanya.

Naa man god unta'y Barangay Anti-Drugs Abuse Council (BADAC) apan unsaon nga wala man kini tumana sa atong mga opisyal sa barangay.

Kining maong punto, gidiskutir na nako kini kaniadto pa, apan ang kadagkoan sa Department of Interior and Local Government mailad ra sa mga opisyal sa barangay.

Ang mga opisyal sa barangay, mohimo ra og report ngadto sa DILG nga kuno naglihok ang ilang BADAC, apan ang tinuod, kutob ra sa papel.

Kun molihok lang g'yod ang mga sakop sa BADAC, sigurado nga makatampo kini pagminus sa problema sa illegal nga drugas kay apil sa mga molangkob sa BADAC mao ang mga presidente sa residents associations nga maoy mohatag og impormasyon sa kapolisan.

* * *

Nalipay ko kay gisuportahan sa ubang konsehal ang sugyot nga karong tuiga, wala nay barangay dinhi sa dakbayan sa Sugbu nga ideklarar nga "drug free."

Ang termino nga drug free nagpasabot nga wala nay drug pusher nga nag-operate sa maong lugar, bisan ang mga user. Motuo mo ana? Tell that to the marines.

Kun ang usa ka barangay ideklarar nga drug free, basin ang mga polis dili na lang mohimo'g operation sa maong dapit kay wala na man diay pusher.

Apan sa tinuod, ang mga pusher daw sa wati nga hilom naglihok sa ilawom ug sa paglabay sa mga buwan, mibalik na kadako ang problema.

* * *

Grabeng bugnawa karon sa panahon uy, diri sa akong gipuy-an duol sa Marco Polo Hotel, bugnaw kaayo mora'g Little Baguio ang kabugnaw.

Wana god nako paandara ang akong cooling pad sa laptop kay di na moinit ang laptop tungod sa kabugnaw sa panahon. Mao tingali nga sa grabeng kabugnaw, gidaug ko sa panahon ug nahilantan.

Maayo na lang kay tungod sa moderno karon nga kahimanan, mahimo lang gihapon nga makasuwat og lindog, ug mapadala sa among editorial office nga dili na kinahanglang moadto pa.

* * *

Abtik nga misanong si acting Vice Mayor Hilario Davide III sa nahitabo nga pagka-trap sa daghang tawo didto sa usa ka night club sa Bangkok, Thailand atul sa pagsugat sa Bag-ong Tuig.

Duna na siya'y awhag ngadto sa kabomberohan ug sa Office of the Building Officials nga susihon ang mga susama nga balay-patigayon sa Sugbu.

Sigurado ko nga kun ayohon lang g'yod pag-inspection, unya estrikto nga ipatuman ang balaud, daghang mga balay-patigayon nga matak-opan dinhi sa ato.

Buyno, dakung hagit kini sa mga inspector sa kabomberohan. Sa OBO hinoon, mora'g tan-aw nako, igo lang dawaton ang awhag pero dili maaksyonan kay kuwang og tawo.