Magpasalamat g’yod ko sa kadagkoan sa Globe kay giatiman dayon nila ang akong reklamo.
Ang tinuod, giaksyonan nila ang akong reklamo bisan og wala pa mogawas ang akong lindog kagahapon.
Pagkahuman god nako og padala sa akong lindog didto sa among editorial office, mitawag kanako ang higala kong si Jonjie Gonzales, ang public relations consultant sa Globe Telecom.
Akong gitug-anan sa akong problema kabahin sa kanunay lang magputol-putol nako nga internet connections. Wala ko magdahum nga gikontak diay dayon niya ang mga technical personnel.
Abtik tuod kaayo nga miari sa balay ang mga technical personnel sa Globe nga gipangulohan ni higalang Renier. Nahapnan tawon sila pagsubay sa akong linya.
Tuod, sukad sa pag-On nako sa computer kaganinang buntag hangtud alas dies na lang, wala na g’yod maputol ang akong internet connection.
Ingon niini ang serbisyo nga angay’ng ihatag sa mga telecommunications networks ngadto sa ilang subscribers. Salamat kaayo sa dali nga aksyon sa Globe sa akong reklamo.
Ang luag nga sinumpayan sa alambre nga gikutay paingon sa akong payag nga nahimutang taliwala sa kalasangan maoy rason nga nagputol-putol ang akong internet.
Unsaon, kining akong payag dia man mahimutang sa hilit kaayong dapit sa bukid nga nag-umbaw sa kinaubsan. Makita gani gikan sa akong nahimutangan ang kabahin sa Lapulapu.
Advance Happy New Year sa mga higala nako sa Globe Telecom, nila ni Jonjie, Jones Campos, Jerry Intig, Atty. Rudy Salalima ug uban pa. Happy New Year.
* * *
Hisgotan ra god nato kining paagi sa kapolisan nga pagbutang og “masking tape” sa sumbohan sa mga armas aron kuno dili maka-indiscriminate firing ang mga polis atul sa pagsugat sa Pasko ug Bag-ong Tuig.
Ok man ang maong tumong. Apan dunay sayop nga pamaagi kay may nakit-an ko nga mga armas nga ang pagbutang og masking tape dili mao.
Posible nga ang mga armas dili na hinuon magamit dayon kun gamiton kini sa hingtungdang polis. Abi ninyo og ngano?
Dunay mga pistola nga giayo g’yod pagpikit og masking tape ang “slide” sa armas nga gipapilit ngadto sa tumoy nga bahin sa “receiver.” Resulta, dili na kini ma-chamber load.
Sa ato pa, kun dunay dinalian nga panginahanglan nga gamiton ang armas, dili na hinuon kini magamit. Maayo nga tan-awon unta kini sa kadagkoan sa kapolisan.
* * *
Hapit na man g’yod mapupos ang tuig, dunay nangutana nako ngano kuno nga grabe ko nga mo-bira og mohimo’g mga atake kun dunay sawayonon sa mga opisyal ug kawani sa kagamhanan.
Ang tubag niana mao nga giisip nako ang media nga maoy representante sa katawhan nga maningil sa mga opisyal ug kawani sa kagamhanan kun nakatuman ba sila sa ilang katungdanan.
Dili nako igsapayan nga ang maigo sa akong birada ako pang mga higala kay walay personalan kining ako. Trabaho lang. Ang tinuod dunay mga tawo nga naigo sa akong atake nga wala na motagad kay nasuko.
Walay problema alang nako kun kining maong mga tawo matangtang gikan sa listahan sa ako untang mga higala. Ang buot nako nga himoong higala mao kadtong mga buotan.
Sama ni Arnel Tancinco nga dunay mga pinili sa pagpatuman sa balaud, dili ko anugnan nga mitangtang sa iyang ngalan gikan sa akong listahan.