“Good day, Sir. Kini bang diri sa Manalili corner Legaspi wala man intawon butangi og Citom nga mag-atiman sa trapiko. Naay mga sakyanan diri nga bisan og GO sa tawo ug STOP sa sakyanan ang signal mopaturatoy lang gihapon. Hapit ko madasmagi dihang dapita. Kada adlaw mao gyud ni mahitabo diri.” -- 0905-1365997 (Sent: 08:24:19am-- October 17, 2008)
Angay gyud bitaw butangan og traffic enforcer kanang dapita diha sa eskina Manalili ug Legaspi. Ako mismo nakasaksi sa mga paugat ug abuso sa mga PUJ driver nga moagi nianang dapita. Hasta ko hapit pod maligsi diha tungod kay bisan og misiga na ang pula nga suga sa trapiko molahos lang gihapon og labang ang mga PUJ.
Ambot, nag-andam na tingaling daan og P200,000 ang mga PUJ driver nga ilang ibayad kun ugaling makabangga sila’g tawo sa pedestrian ug mamatay kini kay mora man sila’g manhid ug dili na mosunod sa mga lagda sa trapiko. Angay disiplinahon ning maong mga driver.
* * *
“Good day, Sir. Grabe na man kaayo kabadlongon nang mga dispatser diha sa Mandaue ug Fuente. Masuko man og wala mi ikahatag. Manggulat man sila. Wala man god mi ikahatag kun primero pang biyahe. Masuko man sila.” -- 0910-4635904 (Sent: 09:46:40am -- October 18, 2008)
Maayo unta kun mabadlong sa proper authorities kanang maong mga dispatser. Abusado na sila kaayo.
* * *
“Dili mawagtang ang drugs sa Cebu kay naa pa man sila si Tata ug Kerwin ug Jaguar. Bisan naa sila sa prisohan pero makapamaligya gihapon og shabu.” -- 0923-2192266 (Sent: 06:24:13pm-- October 18, 2008)
Kun makalusot ang payuhot sa ginadiling drugas bisan diha sa mga bilanggoan, lisod gyud tinuod nga sumpoon ang pagkaylap sa suliran sa drugas.
Angayang susihon ug sutaon kun tinuod bang nalambigit kini sila si Tata, Kerwin ug Jaguar sa payuhot og drugas. Sumala sa atong texter, naa kini sila sa BBRC. Ambot kun unsa kini ka tinuod.
* * *
(Sumbong ug reklamo? Text sa 0910-8105522).