Bagong taon -bagong mundo?

Bagong Taon — bagong mundo

iyan ang hangarin nating Pilipino;

Subali’t paano mangyayari ito

Nag-aaway-away tayong mga tao?

Hindi lamang dito naglalaban-laban

sa loob at labas nitong ating bayan –

Naghahari’y gulo at ang mamamayan

waring umiiwas sa kapayapaan!

Magulo sa bansa gayundin sa labas —

sa lahat ng dako’y maraming pangahas

Pag hindi makuha sa usapang tapat

baril at patalim ang laging pangahas!

Kaya papaanong mundo’y magbabago

pinag-aagawan ang mumo at buto;

May mga saganang hangad ay manloko

at ang mga dukha’y aping-api rito!

Hangad nating lahat maligayang bayan

at ang Bagong Taon maging iba naman;

Subali’t paanong gaganda ang buhay

nakikita rito’y pawang kasamaan?

Pagmasdan mo lamang ang buong paligid

mga taong sukab aali-aligid —

Hindi masiyahan sa sweldong maliit

malalaking sweldo’y iba ang daigdig!

Iilan na lamang ngayo’y sumusunod:

“kakanin ay mula sa sariling pagod”;

Bundok at taniman ngayoy pinapanot

sa hangad kumita kahit walang kayod!

Mga susong bukid at ibang pagkain

dahil sa abono ay nalason na rin;

Umunlad ang palay lumaki ang butil

nang maging bigas na’y lasang fertilizer!

Kaya nga paanong ngayong Bagong Taon

magiging iba na takbo ng panahon?

Hindi asal tao ang narito ngayon —

mayama’t mahirap masama ang layon!