Mireklamo ang ambahador sa nasud sa Thailand sa iresponsable nga pamahayag sa duha ka mga opisyal sa Pilipinas maylabot sa kagubot nga nahitabo sa atong silingang nasud sa Asya.
Gihulagway ni Thai Ambassador Kulkumut Singahara Na Ayudhaya nga di makiangayon ang kumentaryo nila ni Senador Richard Gordon ug Presidential Deputy Spokesperson Anthony Golez nga naghulagway nga ang hinungdan sa kagubot sa Thailand mao ang kakuwang og political maturity sa mga molupyo niini.
Gitandi pa sa duha ka mga opisyal ang mga Pilipino nga matud nila nakakab-ot na sa “highest degree of political maturity” mao nga imposible kuno nga mahitabo ang susamang kagubot sa Thailand dinhi sa Pilipinas.
Matud sa embahador sa Thailand nga ang maong kumentaryo wa ibasi sa tinuod ug posibling dunay nagpahipi nga agenda. Ambot unsay agenda nga buot ipasabot sa maong Thai opisyal?
Apan uyon ko sa iyang pagsaway sa pamahayag nilang Golez ug Gordon. Alang nako di lang gani igo nga iya kining sawayon kun di angayan nga moduso siya og reklamo batok sa maong mga opisyal.
Iresponsabli ug way nawong nga manaway si Golez, Gordon ug si bisan kinsa nga opisyal sa Pilipinas sa Thailand tungod kay utro pod ang atong nasud nga wa magkadimao.
Alang nako way uwaw ug nagpakita sa ilang ka baga og nawong si Golez ug Gordon nga mangangkon nga nakab-ot na sa mga Pilipino ang “highest degree of political maturity” mao nga imposible kuno nga mahitabo dinhi sa Pilipinas ang kagubot sa Thailand diin ang mga anti-government protesters miilog sa duha ka mga dagkong tugpahanan sa maong nasud hinungdan sa liboan ka mga pasahero nga natanggong ug pagkapi-ang sa ilang ekonomiya.
Di buta si Golez ug Gordon nga di makakita kun unsa ka politically immature dili lang ang kadaghanan sa mga ordinaryong Pilipino kun dili silang tanan nga mga opisyal sa atong gobyerno.
Kun wa sila ka kita niana, maayo tingali manamin silang duha aron ilang makit-an unsay hulagway sa “political immaturity.”
* * *
Nakakab-ot na og hukom ang Land Transportation Franchising and Regulatory Board pagpakunhod sa pletihan ngadto sa P7. Apan ang bad news kay kinahanglan pa nga maghuwat ang mga sumasakay hangtud karong Disyembre 15 usa hingpit nga makapahimulos niini.
Alang nako konswelo de bobo ang gitugot sa LTFRB tungod kay labihan na kadako sa pagkunhod sa presyo sa gasoline ug krudo. Dili gani maisip nga piso ang roll back sa pletihan tungod kay daan naman nga dunay 50 sentimos nga provisional roll back sila nga gipatuman.
Ang nakadaot sa LTFRB kay misiwil ang ilang pagka pro-operators inay nga protehian ang interest sa mga sumasakay gikan sa mga mapahimuslanon nga mga operators ug drivers.
Nganong kun increase gani dali man kaayo nga makapatuman ang LTFRB samtang kun roll back gani kinahanglan man nga mamuti ang kalimutaw sa publiko og pinaabot.
Hadlok ba ang mga opisyal sa LTFRB nga di na sila makakuha og endorsement gikan sa mga transport operators alang sa ilang promotion? O nakabahin sila sa makabusdik nga ginansiya sa mga operators karon?
* * *