Mamugos

"Good noon, Sir. Maayo unta nga mabadlong ang mga dispatcher diha sa South Terminal nga mamugos. Usahay ilang birahon imong mga butang. Wala mi freedom pagpili og kasakyan." -- 0918-4385324 (Sent: 06:06:50 pm--January 31, 2008)

Dili kini ang unang higayon nga naghisgot ko bahin sa mga dispatser diha sa SBT. Sa una nakong paghisgot niini, adunay mi-react nga nagpaila nga anaa magtrabaho sa SBT. Miingon siya nga kun adunay reklamo ang mga pasahero, ipadiretso na lang og report ngadto sa management sa SBT.

Busa, kun nakasinati kamog inconvenience sa inyong pagpanakay diha sa SBT, sumbong mo ngadto sa buhatan sa management sa SBT. Gahini lang god ninyog gamay'ng panahon ang pag-adto sa ilang buhatan kun gusto gyod mong mapitol ang mga dispatser nga magpabadlong. Seguroa lang pagkuha ang ngalan sa dispatser.

* * *

"Hangyo lang unta mi diri sa mga opisyales sa Pajo, Lapulapu nga magrobing unta ang ilang mga tanod pirme diri sa New Paradise kay nagkaanam nag kadaghan ang mga rugby boys diri. Ari gyod magtapokay duol sa atubangan sa balay ni Edie." -- 0909-3292993 (Sent: 08:43:10 pm--January 22, 2008)

Attention, mga barangay opisyal ug tanod sa Pajo, Lapulapu City. Aksiyon!

* * *

"Sir, good PM. Naa koy reklamo. Naa ko nagpuyo sa Consolacion. Naay pari diri nga ang kombento mora nag bar kay ang mga babaye maglakaw-lakaw nga mag-panty ra. Bati kaayo ni para namong hugot ang pagtuo sa Dios." -- 0906-9260434 (Sent: 03:07:04pm--January 30, 2008)

Kun tinuod man ugaling kini, seguradong makaeskandalo gayod kini sa hunahuna sa mga parokyano. Anyway, subject pa kini sa confirmation maong dili lang una ta mohukom. Ang akong ikasulti mao nga angay ning susihon sa kadagkoan sa Simbahan. Kusog man silang manginlabot sa mga isyung politikanhon, angay sab tingaling unahon nilag panglimpiyo ang kaugalingon nilang tugkaran.

Magtinabangay ta pagluwas ug paglimpiyo sa imahen sa Simbahan.

(Sumbong ug reklamo? Text sa 0910-8105522).