Manghuwam kuno!

Usa kini ka modus operandi nga ang sagad mabiktima mao kadtong atong kaigsuonan nga nagbaton og mga cellphone.

Ang estilo sa suspek mao nga moduol siya kanimo ug iya kang pakigsultihan. Hanas kaayong modrama ang suspek maong mapatuo, madala sa estorya ug malukmay gyod ang balatian sa iyang prospective victim.

Patuohon niya ang iyang biktimahon nga nawala ang iyang mahalon nga cellphone nga mobalor og P20 mil.

Manghuwam (kuno) siya sa imong cellphone kay iyang kontakon ang iyang cellphone aron pagsubay kun kinsay nakapunit o nagkuha niini.

Sa higayon nga ihatag mo ang imong cellphone ngadto kaniya, nahasulod ka na sa iyang laang. Kay kun atua na sa iyang mga kamot ang imong cellphone, mangita dayon siyag paagi nga malipat ka.

Kun makahigayon na siya, modiretso siyag sibat. Ug ikaw, ulahi ka nang makamatngon nga nabiktima ka sa pangilad!

Pagbantay kamo niini!

* * *

Ang tag-iya o naggamit sa mga numero +6332-5187809 mi-text nako aron pagpadangat sa iyang sugyot nga mas maayong mabutangan og tanod kanang eskina sa Colon ug Borromeo kay gihimo na kanang dansohanan sa mga badlongon sa katilingban.

"Gabii gisaka mi sa jeep sa usa ka tawo nga nagbitbit og kutsilyo dayong tion sa babaye nga naggunit og cellphone. Nakuha gyod ang cellphone ug ang suspek yano rang nilakaw human sa hitabo," nagkanayon ang atong texter sa iyang SMS nga akong nadawat niadtong Agosto 21, 2008 (Sent: 10:01:20 am).

Lehitimo kining pagpakabana sa atong texter. Angay gyod kining hatagan og konsiderasyon sa atong proper authorities aron dili makahuygo ang mga badlongon sa katilingban sa pagpangbiktima sa atong kaigsuonan.

Angay gyod unta nga kanang ibutang diha, tanod man o polis, kanang may kaisog gyod pagbadlong ug pagsanta sa mga badlongon sa katilingban nga gustong mohasol sa mabuot nga mga lungsoranon.

(Sumbong ug reklamo? Text sa 0910-8105522).