Pasalig ni Apostol

Mapaabot na kuno ang mas paspas nga resolusyon sa mga kaso diha sa Ombudsman Visayas. Kini maoy gipasalig ni Deputy Ombudsman Pelagio Apostol human ang ilang buhatan makadawat og daghang pagsaway tungod sa kadugay sa imbistigasyon sa mga reklamo nga napadangat didto sa ilang opisina.

Pananglitan ang kaso batok ni kanhi Kongresista Clavel Asas Martinez may labot sa iyang pagdeposito sa P26 milyones nga kwarta gikan sa iyang PDAF ngadto sa personal niya nga bangko.

Gilumotan na lang ang maong kaso apan hangtud karon wa pa gyud masulbad. Matud hinuon ni Apostol ang kalangan malikayan na karon tungod kay higpitan niya ang pagpatuman sa lagda nga kinahanglang duha ka buwan lang mahuman na ang imbistigasyon sa kaso.

Ang mga imbistigador nga mapakyas paghuman sud sa duha ka buwan manubag. Mamahimo hinuon sila nga mangayo og lugway sud sa 30 ka adlaw apan kinahanglan nga dunay husto ug balido nga rason alang niini.

Matud ni Apostol nga pinaagi niini masiguro na ang kapaspas sa resolusyon sa mga kaso.

Ang record nagpakita nga kulilat ang Ombudsman Visayas sa performance.

Basi sa ilang talaan sa miaging tuig 44 porsiyento lang sa mga kaso nga ilang nadawat ang naresolbar diin kasagaran sa mga gikiha naabsuwelto.

Ang Ombudsman duna lay 28 porsiyento nga conviction rate sa mga kaso nga criminal ug administratiba.

Sa miaging tuig ang Ombudsman dunay kinatibuk-an nga 2,053 ka kaso sa miaging tuig. 992 ang criminal ug 1,061 ang administrative diin 1,077 ang ila pang sinunod sa tuig 2006.

Sa maong gidaghanon 914 lang niini ang ilang naresolbar kon 44.5 persiyento. Pagsugod sa tuig 2008 ang Ombudsman dunay backlog nga 1,139 ka kaso.

Karon hapit na matapos ang 2008 pila man kaha ang backlog nga dad-on na pud sa Ombudsman inig sulod sa tuig 2009.

Hinaut nga mosaler ang plano ni Apostol nga paspasan ang resolusyon sa mga kaso aron wa nay daghang magbagulbol. Labaw sa tanan hinaut nga kun ila man gani nga paspasan dili sab maapektuhan ang kalidad sa imbistigasyon.

Mas maayo nga mapalambo sa Ombudsman ang ilang conviction rate kay labihan gyud intawon nga mubo. Daghan sa mga kurakot nga opisyal magkatawa kun haguka ang imbistigasyon sa Ombudsman.

Laumi Deputy Ombudsman Apostol nga sundon ug bantayan sa publiko unsa ka matinud-anon ang imong pasalig alang sa mas paspas nga disposition sa mga kaso diha sa imong buhatan sukad karon.

* * *

[email protected]