Sa sinugdan nakahunahuna ko nga dili lang kini hisgotan kay basin false alarm nga matawag ang impormasyon nga miabot kanako. Pero sa kadugayan nakahukom kong hisgotan kinig lakbit sa pamasin nga matimbangtimbang kini sa mga magbabasa kun may posibilidad ba nga tinuod ang pasangil sa atong texter.
Abi god ninyo, ang texter nga naggamit sa cellphone number 0920-7421173 mipadangat kanako og kasayoran niadtong Enero 22, 2008 (Sent: 07:13:30am) nga nagkanayon: "Diri sa A. Lopez naay drug lord nga hilom kaayong nanag-iya og passenger jeepney. Labangon-Colon ang biyahe.:"
Alang ninyo, mga minahal namong magbabasa, posible kaha nga tinuod kini? Alang nako, dili ika-discount ang posibilidad. Pero posible sab nga pasangil lang kini sa mga tawo nga nasina sa maong tawo nga miasenso na ang panginabuhi ug nakapanag-iya nag passenger jeepney. Maong gidaot ang iyang pagka tawo tungod sa iyang pag-asenso.
Pero mao lagi. Dili gyod sab nato angay ibale-wala ang posibilidad nga tinuod gyod nga nalambigit sa pagpakaylap sa ginadiling drugas ang maong tawo maong tulin kaayo ang iyang pag-asenso. Kay matud pa, dali ra man ang kuwarta diha sa drugas.
Gihatag sa atong texter ang plate number sa PUJ nga giingong gipanag-iya sa usa ka drug lord apan wala lang nako ipublikar in fairness ngadto sa tag-iya niini. Awhagon nako ang atong texter sa pagsumbong niini ngadto sa proper authorities aron ila kining ma-counter check. Ang akong punto man nga wala tay labot bahin sa iyang pag-asenso. Ang isyu mao ang gipasangil nga pagkalambigit niya sa drugas.
* * *
"Good PM. Kining karsada sa Upper Labogon, Mandaue City guba na kaayo. Daghang libaong." -- 0917-9933462 (Sent: 11:23:29 am--January 20, 2008)
Manghinaot ta nga magpakabana niini ang mga barangay opisyal ug ikapadangat nila kini ngadto sa mas taas nga local government unit kun ugaling dili sila makahimo sa pagpangunay pagsulbad sa maong suliran sa karsada. Maikog intawon mo sa inyong mga kakonstituwente nga nahasol pag-ayo niini.
* * *
(Sumbong ug reklamo? Text sa 0910-8105522)