EDITORYAL - Sum-ol nang mga pangalan

Suma sa labing uwahing sensus, ang Pilipinas aduna nay kapin sa 85 milyones ka mga lumolupyo. Naa pa man gani demographic count nga duna nay 90 milyones ka mga Pilipino.

Pagkadaghan na natong mga Pinoy. Apan tan-awa ra gud ang mga giingong presidentiable kon mga tawo nga buot magpapili pagka-presidente.

Pulos mga karaan nang politiko. Mao ra kining mga ngana nga gustong magpresidente kada eleksiyon sa pagka-pangulo.

Wa na ba gyu’y laing nawong diha? Kana bang bisan dili pa kaayo inila sa natad sa politika apan dunay kapasidad sa pagpangulo.

Pareha bang usa ka Barack Obama didtos Amerika. Wala pa ilhi sa pagsugod niyag padayag sa iyang intensiyon sa pagka-pangulo apan mi-titillate sa tibuok elektorada sa Estados Unidos kay dunay bag-ong nawong ug mga ideya alang sa nasud.