Butangan og polis

Usa ka magbabasa ning lindog mi-text nga nagkanayon: “Sir, hinaot unta nga butangan og polis nga magrobing diri sa eskina Pongsod, Lawaan II, Talisay City kay daghan kaayo ang nabiktima sa tulis diring dapita. Dili lang mga tulisan ang nia diri. Hasta rugby boys mag-estambay diri. Kun mahimo matag oras magrobing diri ang mga polis.” -- 0909-4373967 (Sent: 01:49:38am-- October 8, 2008)

Nasayod ko nga dili igo ang gidaghanon sa mga polis sa Talisay City pagtubag sa tanang yangungo sa mga Talisaynon. Apan kining sugyot sa atong texter angay hatagan og konsiderasyon sa kadagkoan sa Talisay PNP. Lehitimo kining iyang concern.

* * *

“Please ko og patik ning akong reklamo bahin anang karsada sa may Pitogo, Consolacion nga puwerte ka libaongon. Dugay na man unta na pero wala pa man gyud ayoha.” -- 0923-9373549 (Sent: 07:41:31am-- October 8, 2008)

Manghinaot ta nga inigkapatik ning imong text nahatagan nag pagtagad sa inyong mga opisyal ang giingon mong “libaongon” nga karsada dihang dapita sa Pitogo, Consolacion.

Apan kun hangtod ning higayona wala pa gihapon mahatagi’g pagtagad ang maong karsada, awhagon ta ang mga nahingtungdan sa paghimo’g lakang aron masulbad na ang suliran sa gubaong karsada sa Pitogo.

* * *

Niadtong Oktobre 8, 2008 nga gula ning lindog, akong gihisgotan ang mahitungod sa usa ka sakop sa CTMS nga gipasanginlan sa usa ka texter nga nakigkunsabo sa mga dispatser diha sa Opon.

Ang naggamit sa cell no. 0909-2322950 mikompirmar nga tinuod gyud nga dunay taga CTMS nga nakigkunsabo sa dispatser.

“Basta dili ka mohatag og P20, dili ka palinyahon,” nagkanayon ang atong texter.

Maayo unta nga mabadlong kining maong kahiwian.

* * *

 (Sumbong ug reklamo? Text sa 0910-8105522)