Shabu sa Casoy

"Sir, grabe na ang shabu sa Toledo, labina sa brgy. Casoy. Wala gyoy nahimo ang mga barangay officials. Maayo pag himoon na lang legal ang shabu diha sa brgy. Casoy, Toledo City." -- 0929-2741841 (Sent: 11:24:02am--January 24, 2008)

Bisan asang dapita karong panahona aduna nay shabu. Mao bitaw nga dili ko kombinsido bisan pag mga tinugyanan sa balaod pay modeklarar sa usa ka dapit nga usa ka "drug-free" nga lugar kay lisod na kining makab-ot karong panahona.

Dili sab puydeng himuong legal ang shabu kay illegal man gayod kini bisan unsaon nato’g tuali ang mga argumento. Ang atong angay buhaton mao nga isumbong dayon nato ngadto sa mga awtoridad sa higayon nga may mamatikdan kitang drug pusher nga nag-exist sa usa ka lugar aron masanta siya sa labing daling panahon.

Kining giingong grabe na kaayo nga shabu sa Casoy, Toledo City, angay kining i-verify. Labing maayo nga subayon kini sa kapolisan ug sa mga barangay opisyal mismo sa Casoy. Kun masuta nga tinuod kini, angay gyud sikupon ang mga responsable.

* * *

"Good PM, Sir. Concern lang ko sa among lugar. Akong ireklamo ning dapit diin guba na kaayo ang dalan sa may Calderohan, Mandaue City. Daghan na intawon ang nadisgrasya nianang dapita." -- 0928-2213532 (Sent: 03:39:40 pm--January 25, 2008)

Nakabalita man ko nga nagpadayon (kuno) hangtod karon ang pagtrabaho sa gubaong mga karsada sa lainlaing mga barangay diha sa Mandaue City. Manghinaot ta nga inigkapatik niining imong text reklamo natrabaho na sab ang karsada sa dapit nga imong gireklamo ug nasulbad na ang problema.

Pero kun wala pa gihapon matrabaho ang gubaong karsada nga imong gireklamo sa pagpatik nato ning imong text, kining imong reklamo magsilbi untang pamukaw ngadto sa mga nahingtungdan aron dili mohimo’g lakang ning lehitimo nimong reklamo.

Angay gyod atimanon ang karsada diha sa Calderohan, Mandaue City. Tiaw ba nga daghan na man diay ang nadisgrasya diha segun sa atong texter. Dili ta gusto nga may lain pang disgrasya nga mahitabo busa awhagon nato ang mga nahingtungdan sa paghimo og aksiyon kalabot sa problema sa gubaong mga dalan.

(Sumbong ug reklamo? Text sa 0910-8105522)