Mga palusot nga buslot

Sa dihang gihigot si Heneral Eliseo dela Paz didto sa Moscow kay nasakpan nga nagdala og hapit moabot sa pito ka milyon nga salapi, taas kaayo ang dupa sa mga bukton ug kamot ni Interior Secretary Ronaldo Puno nga mitapion ug nanalipod sa Heneral. Matud pa sa kalihim nga panagana lang kun magkinaunsa ang maong kantidad nga dala sa heneral.

Apan dihang nakasabot nga lisod tuohan kay dako og buslot ang iyang palusot, ang heneral kalit niyang gibuhian, gibiyaan ug gisugdan na sa paggukod.

Kay wa na si Secretary Ronaldo Puno, gisuwayan si dela Paz pagsawo sa iyang mistah nga si PNP Director General Jesus Versosa. Cash advance daw ang dala nga kuwarta ni dela Paz. Maayo upod ning atong PNP kay ang mga magretiro na sa katungdanan dili lang ipadala og konperensiya aron magbakasyon ug madugangan ang kahibawo sa pamolice, tugotan pa gyud nga maka cash advance? Unsaon kaha nila pagtingil si dela Paz no? Laing buslot nga palusot!

Kay naglisod pagtubag sa mga pangotana sa mga senador atol sa gipahigayon nga senate inquiry, si Versosa nga todo suporta sa pagpanalipod sa iyang mistah mipadala og suwat sa senado ug nangayog dispensa kauban ang laing palusot nga buslot. Sa iyang suwat nga gipadala sa senado iyang gipasabot nga buot unta niyang tubagon ang mga pangotana mahitungod sa salaping dala ni dela Paz apan sa usa ka executive session lamang tungod sa seguridad sa nasud. Matud pa niya, ang dalang salapi ni dela Paz para ipamalit kini og mga kahimanan sa PNP.

Porbida! Pagkaluoy ni Versosa. Nagkaboang na og depensa sa iyang mistah, makalusot lang kini sa kontrobersiya. Unsa man diay ning mga kahimanan sa atong PNP, utanon nga gipamalit lang sa Carbon o palaliton nga gipamalit lang sa mga shopping mall? Di ba patakaran man sa gobyerno nga ipaagi gayod sa bidding ang pagpamalit og maski unsa nga gamitonon niini? Buslot na usab nga palusot.

Ania ang sumada sa mga buslot mga palusot. Kun panagana lamang ang salapi nga dala ni heneral dela Paz nganong hapit man kini moabot sa pito ka milyon? Kun cash advance man kini, pwede diay nga maka cash advance ang magretiro na nga heneral sa atong kapulisan? Kun para ipamalit og kahimanan sa PNP ang kantidad nga dala ni dela Paz nganong uwahi nang nasayod si Versosa mahitungod niini? Gihimo ba lang kingkoy ni dela Paz ang iyang mistah? Ano ba talaga ang totoo kuya!

Pero in fairness ni Heneral Jesus Versosa, dili siya ang naghatag og pagtugot sa biyahe sa mga heneral didto sa Moscow. Si kanhi PNP Director General Avelino Razon maoy nagtugot sa maong biyahi. Busa angayan lang nga ipatawag sa senado si Razon aron mabati sa mga tawo ang iyang rason.