Nagpadayon

"Good AM, Sir. Hangtod karon nagpadayon gihapon ang mga rugby boys diri sa Humabon St., NRA. Anha sila mag-estambay duol sa LTFRB nga naay mga iskuwater. Kada- ala una ngadto alas dos mag-operation na sila’g pangawat sa kabalayan unya usahay mangisnats. Naa daw nagpaluyo nila nga dako. Madakpan na sila pero buhian ra kay kuno menor de edad. Pero mga gulang na nang mga bataa, 20 anyos na sila." -- 0923-6796177 (Sent: 09:47:05 am--September 7, 2008)

Ang Juvenile Justice Act naabusohan gyud sa daghan ug nagkalainlaing paagi. Tungod sab kini kay kulang kaayo ta sa pagsabot sa maong balaod.

Buyno, bahin anang mga rugby boys diha sa NRA, labing maayo nga aksiyonan kana sa barangay nga maoy nagsakop sa maong dapit. Labing maayo nga palihukon nila ang ilang mga tanod.

Kun tinuod nga may nagpaluyo sa daotang kalihokan sa maong rugby boys, angayan ilhon ang maong tawo aron kapasakaan siyag tukmang kaso tungod sa iyang paggamit sa mga rugby boys. Hinaot unta nga subayon ug imbestigahon kini sa proper authorities.

* * *

"Good day, Sir. Usa ako ka driver. Mangutana lang ko kun nganong diha sa Colon naa may manghingi og P5.00 kada agi? Bawal man kana! Ang police magtan-aw lang. Dili man nila dakpon ang manghingiay. Hinaot unta nga maaksiyonan kana." -- 0909-3744856 (09:13:03am--Sept. 7, 2008)

Ako mismo makadason sa giingon sa atong texter nga igo lang motan-aw ang mga polis sa mga "manghingiay" nga mangdelehinsiya sa mga PUJ driver nga moagi diha sa Colon.

Mahibulong lang ta kun nganong magtanga lang ang mga polis bisan klaro ang gihimo sa mga manghingiay. Dili sab ta makatuo nga wala sila makakita kay dayag man ang pagpangdelehinsiya sa mga badlongon.

Angayan tingaling palapdan sa mga polis ang ilang pagpakabana kay morag ubos ra kaayo ang ilang performance kalabot sa pagsumpo sa mga badlongon sa katilingban.

Labing maayo gyod nga dili i-tolerate ang bisan unsang kalapasan, dinagko man o ginagmay.

(Sumbong ug reklamo? Text sa 0910-8105522)