Usa ka magbabasa ning lindog mi-text nga nagkanayon: "Good morning, Sir. Diri sa Badian, Cebu kusog gyod kaayo ang jai alai. Wala gyoy nakadakop nila diri. Mismo ang mga polis diri sa Badian mopalit man og numero. Hasta man gani ang mga piniling opisyal diri mamusta pod. Ang mga tanod nag-coordinator." -- 0906-1030867 (Sent: 08:12:45 am--Sept. 1, 2008)
Tulibagbag kaayong paminawon kun tinuod man ugaling ang pasangil sa atong texter. Kun ingon niini buhaton sa mga awtoridad ug piniling mga opisyal, mora’g walay paglaom nga masumpo sa hingpit ang illegal nga sugal.
Angay untang magbaton sila’g delicadeza ngadto sa mga magbubuhis. Salikwaot kaayong hunahunaon nga ang mga polis ug piniling opisyal nga mao untay magsilbing modelo sa paghimog maayo, mao na hinuon ang dayag nga nagpakitag partisipasyon sa illegal nga sugal!
* * *
"Good AM, Sir. Driver ko sa multicab diri sa Opon. Pirme lang kong pangayoan anang mga dispatser og tag P20 diri dapit sa may simbahan sa Opon. Nagkumboya ang CTMS ug dispatser. Ang dispatser mao si Pakloy ug ang CTMS mao si Inot. Bug-at kaayo nang tag P20 para namong mga driver." -- 0926-2622633 (Sent: 09:08:25 am--Sept. 1, 2008)
Kun tinuod man ugaling kini nga may CTMS nga nakigkunsabo og dispatser diha sa Opon, dili kini maayong tilimad-on. Maayo tingaling masubay ang kalihokan sa maong sakop sa CTMS sa iyang immediate superior.
Bukas sab kining lindog alang sa mga reaksiyon ug pamahayag kalabot ning maong pasangil.
* * *
"Sir, good day. Palihog lang kog patik ini pamasin nga mahinuklog ang mga tawong hingtungdan. Bahin kini sa kadugay sa honorarium sa mga BHW. Buwan sa Hulyo hangtod karon wala pa gyod. Mao ra intawon niy among gisaligan sa pamugas." -- 0916-6331014 (Sent: 02:09:21 pm--Sept. 1, 2008)
Manghinaot ta nga inigkapatik ning imong text nadawat na ninyo ang inyong honorarium nga mga BHW. Pero kun wala pa gihapon, hinaot unta nga matandog ang balatian sa mga nahingtungdan ug i-release na nila ang inyong honorarium, higalang texter.
(Sumbong ug reklamo? Text sa 0910-8105522)