Nasikop ug natangkal na gayud ang notoryus nga anak sa mayor sa dakbayan sa Talisay.
“Yesss!” matud pa sa usa ka inahan. “Kiniiii!” tubag sa laing inahan.
Nasagmuyo man si Brod Soc Fernandez ning pagkasikop sa iyang anak nga si Joavan sa mga ahente sa National Bureau of Investigation (NBI) apan gikalipay kini sa kadaghanan gumikan sa rason nga nasayran na sa tanan.
Ang nakapuno sa kalipay sa mga tawo mao nga NBI ang nakasikop. Dili polis nga sa dugay’ng panahon wa gyud makatandog ni Joavan bisan pa sa kadaghan nang pagpangabuso nga nahimo niini.
Manghinaut kita nga adunay maayong kalambuan kining pagkasikop ug pagkatanggong kang Joavan.