Binukbukay sa Naga

CEBU - Ang Sugbu mokulit na sab og laing kasaysayan sa natad sa boksing dihang tulo ka WBO regional championships fights nga ulohan og "Saga in Naga" ang ipahigayon karong gabii didto sa Naga City.

Ang ekplosibong triple-header laing dalit ni international promoter Sammy 'Don King' Gello-ani sa SGG Sports Promotions uban sa abag sa kagamhanan sa dakbayan sa Naga ubos sa liderato ni Mayor Val Chiong.

Sa main event, si Ramie Lapu sa American Boxing Academy (ABA) Gym nga nagbase sa Davao moharong ni Mongkolchai Singmanasak sa Thailand alang sa WBO Asia-Pacific interim super bantamweight title, samtang laing boksidor sa ABA nga si Fernando Lumacad makigsinukliay og kumo ni Saensaknoi Sor Muangklang alang sa interim WBO Oriental flyweight crown.

Sa lain pang moaway sa triple-header mao si flyweight prospect Marvin Sonsona sa General Santos City nga makigbinukbukay ni Joel Rafols sa Manila alang sa WBO youth title showdown.

Molamas sa boxing card mao ang away ni Fabio Marfa batok Ronald Castrodes, Reil Mandate batok Ryan Tampus, Jongwoon Choi batok Jestoni Pepito ug Rolando Magallano batok ni Dizon Dag-ong.  (THE BANAT)