Usa ka texter mipadangat nakog kasayoran mahitungod sa usa ka mangingilad nga naglihok karon sa Metro Cebu. Mas maayong masayran ninyo ang estilo sa modus operandi sa maong mangingilad aron makabantay kamo ug dili mabiktima niining tawhana.
Sumala sa text sa atong tipster: "Naay mangingilad nga gulang na. Mag-edad na gyod siya og 50 kapin, itomon ang pamanit, kulot og buhok ug nia ra ni diri sa Cebu. Mopalit kunohay siya ug unya ang kuwartang ibayad tibuok P1,000. Unya magpasukli dayon kay ang rason gadali kuno siya. Unya kun masuklian na, moingon nga dili na lang siya modayon og palit kay gimahalan ra kuno siya. Kuhaon dayon niya ang iyang kuwarta. Inig-uli niya sa sukli, kuwang na. Daghan na gyud ang nabiktima ini nga modus." -- 0920-3608533 (Sent: 12:54:16 pm--August 21, 2008
Lain na sab ning paagi sa lipat-lipat sa mga badlongon sa katilingban. Maayo unta nga makabantay niini ang atong kaigsuonan nga adunay mga tindahan.
* * *
"Good PM, Sir. Diri sa Kimba, San Roque, Talisay City dunay tawo nga nag-wild kay hubog ug nanghasi. Nanawag dayon mi og polis sa Talisay. Unsa mang pagkaunsaa nga nanawag man hinuon og tanod ang mga police ug maoy ilang giparesponde kay wa kuno silay sakyanan. Kun pananglit armado og pusil ang nag-wild patay mi tanan hasta ang tanod. Way ayo, pulpol mga polis." -- 0926-7787967 (Sent: 08:27:28pm--August 21, 2008)
Dili lang kay pulpol kundili nangatulog sa pansitan ang maong mga polis. Nagpakauwaw lang sila sa ilang kaugalingon sa atubangan sa mga magbubuhis sa Talisay nga angay unta nilang panalipdan.
Dili ba mao man ning ilang tahas ang pagserbisyo ug paghatag og proteksiyon sa mga lungsoranon kansang buhis maoy gisuweldo kanila?
Pastilan, morag buyboyonon man ang maong mga polis kun tinuod man ang alegasyon sa atong texter!
Palamboa ninyo ang sistema sa inyong panerbisyo, uy! Porbida!
* * *
(Sumbong ug reklamo? Text sa 0910-8105522)