Naunsa man intawon ning mga opisyal nato sa City Hall uy, mora man og mga pating.
Ang termino nga “pating” kana bitaw’ng mga tawo nga dili gayod maminaw ingon man dili mauwaw nga tabla ra sila og gaduwa-duwa sa ilang trabaho.
Ang gipasabot nako niini mao ang kapakyas ni Mr. Gerry Marquez sa pagpatuman sa kamandoan sa mayor nga did-an lagi g’yod nga makapaninda diha dapit sa eskena Osmeña Boulevard ug D. Jakosalem kadtong duna nay tindahan sa laing pwesto.
Mora na man lang ta og “plakang buak” ani nga gabalik-balik sa mao ra gihapong isyu. Ang tinuod, gipul-an nako nga pirmi lang makadawat og text message sa mga tindera’g imahen nga misumbong sa ilang pag-antos.
Pirmi nila nga gisumbong nako nga samtang sila walay pwesto, ang ila lagi nga presidente nga si Haide “Basan” Amora duna gihapo’y pwesto nga gipabantayan lang og laing tawo dapit sa eskena?
Ang mitug-an nako niini mao g’yod ang manghod ni Bay Basan. Ang tinuod, kini si Basan ug Gerry Marquez, pulos ni sila nako mga higala. Apan unsaon ta man nga dili man kalikayan nga mahisgutan sila dinhi sa atong lindog.
Nakadungog ko nga mora’g nasuko na si Gerry nako kay kanunay nako siya nga giatake sa akong lindog tungod sa pagpabuta-bungol lang niya sa problema sa mga vendors bisan og siya man unta ang gitugyanan sa mayor pagsulbad sa problema.
Unsa man g’yoy nahadlokan nimo Ger? Nganong ang kamandoan sa mayor wala man gihapon ikapatuman? Duna pa diay laing opisyal nga labaw pas mayor diha sa City Hall?
Pasensya lang g’yod mo kay wala koy pilion kun mohisgot na ko dinhi sa akong lindog. Makapahibulong man god kaayo nga wala g’yod gihapon ninyo maaksyoni ang kamandoan sa mayor.
Dihay usa ka higayon nga si Inday Amora-Batiller ang igsoon ni Basan, mitug-an nako nga dihay usa ka opisyal sa urban poor group nga gihatagan og kwarta sa nakabentaha, kumkom kuno dayon.
Akong klarohon nga dili si Gerry ang iyang gipasabot. Ang gipasabot ni Inday mao ang tawo nga ang ngalan nagsugod og “R” unya ang apilyedo “E.”
Apan kun walay aksyon si Gerry mahimong makaduda kaniya ang ubang mga apektadong tigbaligya og imahen sa mga santos. Lihok na god Ger. Ang tinuod, wala na ko ganahi mokontak aning Gerry kay sigi lang gaunya-unya.
* * *
Daghan man gihapong mga nagmaneho og motor nga nagsul-ob karon og sinilas ug ang uban walay helmet.
Apan wala makagusto si Mayor Tomas Osmeña sa maong kamandoan sa Land Transportation Office kay usa kini ka balaud nga lisud kaayo ipatuman.
Kun ako hinuon ang pangutan-on, lisud kining ipatuman kun ang atong mga mananakop mga ligoy. Kasayon ra dakpon anang mga tawo nga magsinelas unya maglisud mo?
* * *
Nindot kaayo ang gitambongan nako nga media briefing kagahapon didto sa Marcelo B. Fernan Press Center sa Lahug. Ilabi na karon nga daghan kaayong party nga tambonganan sa media, tukma kaayo ang maong isyu.
Kana ba nga “buffet” ang estelo sa paghatag og pagkaon sa mga bisita, kana bang ikaw ray pakuhaon sa gusto nimong pagkaon, dili diay maayo nga mobalik ka pagkuha pinaagi sa ginamit na nimo nga plato.
Kini g’yod maoy sagad nako nga makit-an apan wala lay nakatambag sa tukma nga lagda. Daghan pa kaayo nga mga punto nga gidiskutir kagahapon sa opisyal sa Department of Foreign Affairs sa Manila.