Pagkabulahan sa mga senior citizen sa Makati City

Ambut mahimo ba kaha ni sa ubang mga dakbayan sa nasud, lakip ang atong Cebu City – Libre ang pagtan-aw sa kasinehan sa Makati City, alang sa tanang mga senior citizen sa maong dakbayan.

Giingon dinhi: “libreng sine para sa senior citizens, anumang oras, anumang araw, at kahit ilang beses.” Mahimo kaha ni nato dinhi, Dro? Ug dugang niini, libreng sakay pa, kuha gikan sa ilang mga barangay ngadto sa mga sinehan ug hatud balik ngadto sa ilang gigikanan. Ngiga no?

Sulod sa siyam ka buwan sa miaging tuig, ang Makati migasto og P5,490,434 bayad sa balig 180,303 ka tiket matag buwan sa nag-unang mga sinehan sa dakbayan. Ang pundo gikan sa Special Activity Funds sa Office of the Mayor.Giunsa kaha ni nila no nga kita dinhi, gidid-an na man gani ang Cebu city apaggasto alang sa Sinulog? 

Unya, ang mga chapter president sa kahugpungan sa mga senior citizen aduna pay honorarium, ug majority sa mga barangay hall sa Makati, duna gyuy opisina ang mga senior citizen. Kami sa Guadalupe, bisag bangko na lang wa gyud. Samot na sa ubang mga barangay sa Cebu City, ang queen city of the south. Nakabintaha ang Labangon, tungod kay si Barangay Captain Dodo Abella, mao may regional president sa Federation of Senior Associations of the Philippines (FSCAP).

Aduna silay gitawag nga “Lakbay Saya.” Usa ka regular nga libreng citywide tour sa mga senior citizen. Ug karon, sukad sa 2004, nahimo nang out-of- town tour, ug lakip sa ilang naduaw mao ang Corrigedor Island, Bicol, Bulacan, Baguio ug dinhi sa Cebu City. Samot og di gyud ni mahimo dinhi kay mao ray pasuroysuroyon sa atong dakbayan ang mga konsehal ug ubang kadagkuyan sa city hall. Padaplin mga senior citizen.

Duna sad silay gitawag nga Blu Card Program, nga manghatag og P2,000 nga cash gifts (P1,000 matag Hunyo ug laing P1,000 matag Pasko). Pakapinan kinig birthday cake, free delivery pa, ug laing cake alang niadtong magsaulog sa ika-50 ka tuig nga sumad sa pagkasal. Makaabot kaha ta ini, Dro? Sa miaging tuig, kapin sa 120 mil ka senior citizen ang nakadawat og birthday cake, ug mga 50 ang nakadawat sa pagsaulog sa ilang 50th wedding anniversary.

Pagkabulahan sa mga senior citizen sa Makati City. Ato ning padayonon paghisgot sunod lindog, kay daghan pa kaayong mga benepisyo ug mga kaayohan ang gitanyag sa Makati ngadto sa ilang mga senior citizen.