Wa magsunod

Ang naggamit sa cell.no. 0910-2773749 mi-text nako niadtong Agosto 17, 2008 (Sent: 06:47:47 pm). Ang iyang concern mahitungod sa suweldo sa mga trabahante sa usa ka shipping company.

Segon sa iyang text, angayan gyong pabisitahan sa taga DOLE ang buhatan sa maong shipping company tungod kay "wala sila magsunod sa eksaktong minimum wage rate."

Dugang niini, "dili pod nila pagabayran ang overtime sa mga trabahante," sumala sa atong texter.

Dako kining maong shipping company. May mga barko gani kini nga nagbiyahean ngadto sa Manila.

* * *

"Sir Uriel, aduna koy concern mahitungod sa mga mini bus nga mobiyahe paingon sa Sogod ug Poblacion Borbon gikan sa Cebu City. Molabyog ni sila ngadto sa Sagay ug Ilihan. Ang kolektahon nilang plite paingon sa Cebu City tag P100, wala silay ticket nga ihatag sa pasahero. Labaw na hinuon ang ilang plite sa dagkong mga bus sama sa D'Rough Riders ug Ceres Liner. Husto ba kining gibuhat sa mga mini bus? Ug simbako madisgrasya manubag ba kaha ang operator nga dili man ni ilang rota? From Felu Brigoli." -- 0928-6838821 (Sent: 08:08:01 pm--August 17, 2008)

Wala na ko masuheto sa plitehan dihang dapita kay dugay-dugay na akong wala makaanha sa Sogod ug Borbon, labina sa brgy. Sagay ug Ilihan.

Ang akong ikasulti mao nga kun unsay gitakda sa taripa, kana ang angay sundon sa mga minibus. Kun sobra sa gilatid sa taripa ang gipaningil nilang plitehan, dako kanang tinonto.

Angay ning subayon sa proper authorities, labina sa LTFRB ug LTO.

* * *

Ang naggamit sa cell. no. 0909-7471272 mi-text nako niadtong Agosto 17, 2008 (Sent: 07:51:42 pm). Duna lang siyay gustong ipaabot ngadto sa Arsobispo sa Sugbu.

Sumala sa iyang text, angay imbestigahon sa kardinal ang usa ka kura paruko sa usa sa mga parokya sa Toledo City nga nabaniog nga nakapaanak. Sugarol sab (kuno) ang maong pari!

Aksiyoni!

(Sumbong ug reklamo? Text sa 0910-8105522)