Sublion nako ang pag-awhag sa kontraktor sa usa ka proyekto sa Metro Cebu Water District (MCWD) diha sa dalan Echavez nga mibalik na usab ang kahasol nga nasinati sa mga motorista tungod anang inyong gikubkob nga daw kanal lagbas sa karsada.
Nagpasalamat unta ko kay human nako gituki dinhi sa Renbor Patrol ang maong problema, inyo dayong gitagad pinaagi sa pagbutang og filling materials ang daw kanal nga milagbas sa karsasa, apan nahanaw na usab ang maong mga lapok.
Nganong dugayon pa man ninyo pagpabalik sa naandang sitwasyon sa karsada? Unya ra ba, pabugdohon na usab na ninyo nga daw mahisama na unya na sa “ramp” nga mag-untol-untol ang mga sakyanan nga moagi.
Maayo ra ba og gamay ra na nga mga kanal nga naglagbas sa karsada, pwerte ra ba g’yong daghana. Subra tingali na sa napulo. Atensyon mga opisyal sa MCWD, i-monitor ra god ang trabaho aning gikuha ninyo nga kontraktor.
Sayod ko nga dili kini direkta ninyong mga kawani kay wala mag-uniporme ug walay sakyanan sa MCWD. Grabe kahasol ang masinati sa mga motorista nga moagi diha sa Echavez tungod anang daghan kaayong mga kanal nga milagbas sa karsada.
Tawgon usab nako ang atensyon ni higalang Konsehal Nestor Archival nga moabag sa paghatag og pagtagad niining maong problema.
* * *
Maghisgot man ta og bati nga karsada, diha sa Mandaue daghan man diay ang nag-reklamo sa kapakyas ni Mayor Jonas Cortes pagtagad sa gubaong karsada sa barangay Tawason.
Dunay nag-text nako nga bisan pa og gihatagan og milyon-milyon ka pesos nga budget si Mayor Cortes aron ipaayo sa mga gubaong karsada, wala man gihapon niya mapaayo.
Laing taga-Mandaue nga mipadala nako og text miingon nga mao kunong dugay kaayong nakapatrabaho si Mayor Cortes kay duna diay tulo ka grupo diha nga mag-ilog sa mga proyeto.
Unsa ba kining giingong “Kabanay Incorporated” Mayor Cortes? Mora’g imo kuno kining mga kabanay nga mag-ilogay sa pag-angkon og proyekto aron makaangkon og komisyon. Tinuod ni?
Nakasulod bitaw ko diha sa hilit nga dapit sa Mandaue kay mopalit unta ko og mga kabilya gikan g’yod sa usa ka pabrika, pastilan, naghiyod-hiyod ang akong sakyanan uy kay bati g’yod kaayo ang karsada.
Kun tinuod man Mayor Cortes nga dunay imong mga kabanay nga mag-ilogay pag-angkon og mga kontrata sa mga proyekto aron makakomisyon, maayong mentras sayo pa imo silang badlongon kay makadaut kini sa imong administrasyon.
* * *
Akong daygon si Konsehal Edgardo Labella ug Konsehal Arsenio Pacaña, mga sakop sa konseho sa dakbayan sa Sugbu.
Bisan og gidid-an ang mga konsehal ni Bise Mayor Mike Rama nga mohatag og dukomento sa mga sakop sa media kabahin sa gisugyot pa nila nga mga resolusyon o kaha committee reports, wala gihapon sila magmakuli niini.
Samtang daygon nako ang duha ka konsehal, ang ubang konsehal nga mahadlokon sa pagbaud kanila ni Rama, akong pangyam-iran.
Kining maong mga konsehal nga mahadlok gani bisan sa paghatag og dukomento sa media, labaw pa nga mahadlok nga moalkontra sa mga disisyon sa mayor.
Dili ba tinuod? Sumala, duna bay konsehal nga nagpakita’g kaisog paghatag og baruganan kun husto ba o dili ang laraw pagbaligya sa Cebu City Medical Center?
Mao bitaw na ang rason nga hinganlan ra mo sa oposisyon nga mga “rubber stamp” sa mayor. Duna hinuo’y uban diha nga mobarug gyud, sama ni Konsehal Bebot Abellanosa.