Gaid sa propesyon

Gikunis-kunis pag-ayo sa Sugbuanong OFWs ug sa ilang mga kapamilya ang balaodnon nga nagmando nga ang mga propesyonal kinahanglan nga motrabaho una og duha ka tuig sa Pilipinas sa di pa sila tugotan nga makatrabaho sa ubang kanasuran. Ang balaodnon nga nag-ung-ong karon sa Kongreso gitumong pagpugong nga mahurot ang mga doktor, nurses, inhinyero ug ubang mga propesyonal sa pagbiya ug nga mainutil nang atong mga tambalanan ug ubang batakang mga pangalagad pila ka tuig gikan karon.

Mga kongresista nga nagpaluyo sa balaodnon makahampak sa ilang dughan pag-angkon nga nahigugma sila sa nasud. Apan ang mga nangapil sa survey sa DYAB Abante Bisaya sa kontrobersiya malampusong nipintal nila nga pulos way tarung kabuot.

* * *

Ang nangamahan sa balaodnon mao ang bayaw ni Pres. Arroyo nga si Kongresista Ignacio Arroyo sa Negros Occidental. Ubang mga propesyonal nga maigo sa iyang House Bill 4580: Pharmacists, midwives, medical technologists, physical therapists, teachers, sailors, accountants, interior designers, nutritionists, criminologists, librarians, guidance counselors ug master plumbers.

Si Kongresista Arroyo mas nailhan sa iyang pagdupa sa iyang maguwang, si First Gentleman Mike Arroyo, ug bayaw sa pagkabisto sa bank account ni Jose Pidal. Ang karaang eskandalo nga gihulga ni Senador Panfilo Lacson nga banhawon karong bag-o. Wa igdungog si Kongresista Arroyo sa kamanggialamon sa iyang mga balaodnon ni mga baruganan nagkalainlaing mga kontrobersiya nga gituki sa bay balaoranan.

* * *

Niang hinugpong nga mga argumento sa mga nangapil sa among “Pulso” gikan sa Sugbo nga naminaw sa DYAB 1512 khz ug gikan sa nagkalainlaing kanasuran sa kalibotan nga naminaw sa DYAB Skypecast:

• Di makiangayon ang paggaid sa mga mamumuo sa mga trabaho dinhi nga gagmay og suholan ug mga benepisyo, ang uban biktima pa gani sa kalapasan sa minimum wage law, bisan dunay nagpaabot nilang mas maayong mga trabaho sa ubang kanasuran;

• Unsa may mahitabo kon way matrabahoan ang mga gradwado dinhi tungod sa kakuwang sa kahigayonan sa trabaho nga namugna sa kagamhanan ug sa pribadong sektor?;

* * *

• Way mahimo ang kagamhanan pagpugong sa mga propesyonal nga manglarga sa ubang kanasuran, mahimo silang manlarga isip mga turista ug mao na lay mangunay paghikay sa ilang panrabaho sa gawas, nga makapadako lang hinuon sa ilang kahigayonan nga mabiktima sa panaugdaog;

• Wa na kinahanglana ang balaodnon kay ang employers sa ubang kanasuran maoy nay motakda sa mga panginahanglan sa trabaho, apil nang pila ka katuigan nga kasinatian nga motino sa kahaom ug kaandam sa mga aplikante; ug

• Ang mas epektibong paagi pagdasig sa mga mamumuo pagpabilin sa nasud mao ang pagtanyag nila og mga suholan ug mga benepisyo nga moambas sa gitanyag sa ubang kanasuran, o bisan mas dako lag dyutay sa ilang gidawat karon dinhi sa ato.

* * *

Email:   [email protected]