Salamat, Ma’am Naring

Wa kong kaila niya dihang nitanyag siya paghatod sa mga hinabang sa mga Sugbuanon ngadto sa mga biktima sa bagyong Frank. Usa sa nangu sa mga boluntaryo sa relief campaigns sa KBP Cebu Chapter ug DYAB Abante Bisaya, Roger Pepito, maoy taytayan namo niya. Kinsa naluoy diayng naminaw sa akong pakitabang sa radyo og kakargahan sa relief goods alang sa Daanbantayan ug Iloilo.

Apan hugot mi niyang gipasidan-an sa di pag-ila sa iyang ngan. Maong pangayuon nakong iyang pagsabot nga taguon lang nato siya sa ngan nga Ma’am Naring.

* * *

Human sa among paghatod sa hinabang sa Daanbantayan, gipasusi ni Ma’am Naring unsay mga agianan nga mahimong masubay sa iyang mga trak kon maoy kargahan sa among relief goods alang sa Iloilo ug kasadpang Kabisay-an. Naikog ko busa wa motingog. Apan human sa pila ka adlaw naningil siya kanus-a mi manglarga.

Tuod man, nahinayon gyod mi ug malampuson ang pagpanghatag og hinabang sa mga biktima sa katalagman sa Iloilo niadtong Lunes ug Martes sa niaging semana. Hangtod karon, nag-awas ang akong kasingkasing sa pasalamat. Maong mangahas ko pagpasalamat ni Ma’am Naring pinaagi ning kabos nakong lindog.

* * *

Wa ko magpalabi-labi sa akong mga taho sa DYAB Abante Bisaya, samtang nagbiyahe mi paingon ug gikan sa Iloilo, nga gihanigan sa kamanggihatagon ang matag dangaw sa taas namong panaw. Kay gikan sa ABS-CBN Broadcast Complex ug Cebu Normal University, diin gitipigan ang mga hinabang, hangtod sa Tiongco Elem. School, Diocese sa Jaro ug ABS-CBN Iloilo, diin gi-apud-apod ang mga hinabang, ug hangtod sa among pagbalik sa Sugbo, ang pag-amuma ni Ma’am Naring nisagakay namong tanan.

Wa ko mangahas pagpangutana ni Ma’am Naring pilay iyang gasto: Sa pagkaon (kapin mi sa kawhaan) sa duha ka adlaw; sa krudo sa tulo niya ka sakyanan; sa plitehan sa mga barge ug sa mga bayranan sa mga pantalan; ug sa hotel nga among gipahuwayan. Wa pay labot ang kahigayonan sa patigayon nga nausik.

* * *

Nasihag nako ang tinuorayng taras ni Ma’am Naring sa duha ka adlaw namong panag-uban:

l Dihang nakakita ko nga katulgon na silang Ma’am Naring ug iyang mga kapamilyang Ma’am Yoding ug Ma’am Narcisa ug ubang mga babaye namong kuyog kay naabtan og lawom nang gabii ang pagdiskarga sa relief goods sa ABS-CBN Iloilo, nisugyot ko nga mouna na lang silag panihapon ug pahuway sa hotel, apan nitubag si Ma’am Naring nga magdungan ming tanan pagpangaon ug pagpahuway; ug

l Dihang naunhan mi sa ubang mga sakyanan sa barge gikan sa Escalante paingon sa Tabuelan bisan duna mi bill of lading, si Ma’am Naring naikog sa ubang mga magpapatigayon ug nisugot nga mabiyaan ang iyang duha ka trak, ang van rang gisakyan sa mga boluntaryo maoy gipauna.

* * *

Email:[email protected]