Balagtasan

Itong Balagtasan binubuksan ko na

Ito’y pagtatalo sa wikang patula;

Ito’y isang sining na yaman ng bansa

Tumpak lang buhayin sa Buwan ng Wika!

Itong Balagtasan ay unang nauso

Nang wala pang TV –- libangan ay radio;

Ito ay lingguhan at hintay ng tao

Pagka’t bumibigkas mahusay bumerso!

Unang Balagtasan ay pinagtalunan

Ng dalwang makatang tubo sa Bulacan;

Corazon de Jesus unang nangatwiran

At Nemesio Caravana sumegunda naman!

“Bulaklak ng Lahi” naging unang paksa

Pinagdebatihan ng dalwang makata;

Sino sa kanila ang mahal ng mutyang

Bulaklak ng lahi na laging sariwa!

Unang Balagtasa’y nalimbag sa aklat

Na sa  high school subject noo’y ginagagad;

Pinagtataluna’y puso ng bulaklak

Nina Paruparo’t Bubuyog sa gubat!

Itong Paruparo’y naghayag ng panig

Na siya ang dapat na magtamong langit;

Ngunit si Bubuyog na laging kalapit

Nagsabing siya raw ang s’yang iniibig!

Si “Huseng Batute” saka Caravana

Sila ay sinundan nang maraming iba;

Noo’y may indayog kanilang pagtula

Kaya itong baya’y lubos ang paghanga!

Sa hindi malamang sanhi at dahilan

Biglaang naglaho itong Balagtasan;

Salamat kay Mayor at sa kanyang Ginang

Dito sa San Pedro ito’y binubuhay

Si Mayor Cataquiz at ang kanyang Misis

Itong Balagtasan ay ginawang contest

Kaya ngayon dito tayo’y magmamasid

Sa mangag-aaral na dito’y titindig!