Wa hatagi og kahigayonan sa kontroladong mga miyembro sa Regional Development Council nga mapresentar sa mga representante sa dakbayan sa Lapu-lapu ang ilang Audio Video presentation nga ilang gitukawan sa paghimo aron makadani ug makaagni sa mga nanambong sa gipatawag nga tigum aron matuki ang duha ka resolution nga nag-awhag sa presidente sa pag-usab sa iyang pagtugot sa Mactan North Reclamation and Development Project ug sa pag-awhag sa Philippine Reclamation Authority sa pagkuha una og rekomendasyon gikan sa Regional Development Council sa dili pa kini mohatag og pagtugot sa mga reclamation project.
Atol sa botohay, nag-inusara lamang intawon si City Administrator Teodolo Ybanez sa dakbayan sa Lapu-lapu nga misupak sa kaluhang resolution.
Kung imong tutokan ug sabton ang baruganan sa Regional Development Council kon RDC nga gipangulohan ni Gobernadora Gwendolyn Garcia dili sila supak sa nahisgutang proyekto, ang gusto lamang niini mao nga moagi kini sa RDC. Apan ang balaod nag-ingon nga kun lokal nga pundo ang gamiton sa proyekto sama sa Mactan North Reclamation and Development Project dili na kini moagi pa sa RDC! Unsa ba gayoy interest sa RDC niining proyekto ni Mayor Boy Radaza? Ang RDC gyod kaha ang adunay interest niini o ang ilang pangulo nga si Gobernadora Gwendolyn Garcia? Politika kaha ang hinungdan sa hugot nga pagsupak sa mga Garcia ning maong proyekto?
* * *
Nakapaalarma na sa mga taga Quiot ning dakbayan sa Sugbu ang sunod-sunod nga krimen nga nahitabo ning maong barangay. Kaniadtong Domingo duha ka pasahero sa tricycle ang patay human kini birahi sa mamumuno nga nagsakay og motorsiklo. Semana sa wa pa ang maong krimen, patay usab ang usa ka katabang nga lalaki human kini magdumili sa paghatag sa iyang celphone sa dihang gitulis sa nag inusarang tulisan dili halayo sa may Bayanihan. Gisundan usab kini sa laing pagpanulis duol sa may Mountain view. Unsa na bay nahitabo ning atong barangay kapitan? Hinaot pa unta nga daling masulbad ni Kapitan Jun Ramos ug konseho sa barangay kining maong suliran. Manghinaot lang usab ako nga palapdan sa atong kapulisan ang paglutos ning mga badlungon sa atong katilingban.
.* * *
Kapin sa 27 mil ka mga bag-ong nurses ang nakapasar sa miaging nursing board examination ug sa maong gidaghanon 14 ka mga Sugbuanon ang nakasulod sa top 10. Ato untang ikalipay ang ilang pagpasar kun sa Pilipinas pa silang tanan moalagad tungod kay daghan naman ang makaatiman ug makaalagad sa mga nagmasakiton tang kaigsoonan, apan ang subo kay adto sila moalagad sa gawas sa nasud nga dili nila kadugo.