Kalipay sa pangurakot!

Giingon nga tungod kay lumalabay ra gyud ang tanan ning kalibutan, lakip ang kalibutan mismo, temporaryo ra gyud ang tanan, lakip kining atong gitawag nga kalipay.

Maoy hinungdan nga daku ang atong katingala ngano nga kitang tawo, ikaw ug ako, Dro,  maningkamot gyud, mangitag mga paagi – by all means, by hook or by crook, aron maangkon ang kalipay.

Unya, tungod kay mokilab man lang ang kalipay, ilabinag lawasnon ug kalibutanong kalipay, padayon ang pagpangitag dugang kalipay, by all means gihapon, by hook or by crook.Vicious cycle.

Mao ba kini, Dro, ang hinungdan ngano nga di gyud nato masanta ang korupsyon dinhi sa atong nasud, the only Christian country in the far east? Ikaw’y tubag ini, Dro, wa na koy labut ini. Igo lang kong nangutana.

Si Kuya Boy Odilao, nag-text na usab kanato. Ania: Happiness is something you carry in your heart. Give it away generously and it will return to you a thousandfold. Nindot. Apan, kining kalipay nga imo karong gihambin sulod sa imong kasingkasing, diin man ni gikan? Unsa may imong gikalipayan? Nalipay ka tungod kay nagmalampuson ang imong smuggling activities, ug hapsay ang imong pangurakot, Dro?

Mao ni ang imong gikalipayan? Ug mao ni ang imong i-share sa imong banay ug kahigalaan? Mao ni ang giingon ni Kuya Boy nga “give it away generously?” Pinaspasan nga kalipay. Paspas sad kaayong mahanaw. Ilabinag tulisokon na ikaw, Dro, sa imong tanlag (kana kun duna pay gamay’ng nahibilin sa imong tanlag).

Ug laing sakop sa Afrena 7, si Mart Mercado, kanhi regional director sa DSWD, mi-text usab: “If you leave something wonderful with those who come to your life, they will find it hard to erase you from their hearts.” Nindot sad kaayo.

Ug unsa may “something wonderful” nga imong ibilin ngadto sa imong kahigalaan nga mosangpit kanimo? Resulta sa imong pangurakot, Dro? Ug sa higayon nga dili ikaw ma-erased sa ilang panumdoman, unsa may impression nga masulod ang mga maayo nimong binuhatan, o ang imong ka-maro’ ug pagkatikasan?

Mao nga, Dro, di man gyud ka mag-pirme diha sa imong nahimutangan karon, bisag unsa ka adunahan ug kagamhanan, paningkamot nga ang imong mabilin sa kasingkasing sa uban, tinuod gyud nga “something wonderful!” nga kahimut-an sa Dios.