Sa kasamtangang panlantaw makaingon kita nga ang maong magpupugas walay igong sistema ni wala tingali maggamit sa iyang sentido. Hinuon, dili kita makabasol sanglit ingon ana man ang ilang balansayon sa agrikultura sa ilang kapanahonan. Apan dunay nindot ug tabunok nga implikasyon nga buot ipaabot sa atong Ginoo alang sa iyang mga maminaway. Ang sanglitanang gigamit nagpasabot sa dakong bili sa Pulong sa Dios diha sa atong tawhanong kinabuhi ug bisan pa man kun kini gamhanan ug makabuhi, adunay dakong partisipasyon ang gipugasan nga mao ang tawo aron kini patuboon ug palamboon.
Lisud kaayo sa usa ka tawo ang pagpunay og paminaw sa Pulong sa Dios apan ipalabay lang sa pikas dalunggan. Labaw nga sakit palandongon kun bisan pa man nga nasayod nang daan sa bili niini apan midumili sa paghimo sa gihagit niini. Mao nga wala gihapon makab-ot ang kausaban. Padayon kitang nagpuyo sa kinabuhi diha sa kahaguka.
Ang Dusong Pastoral sa Artsdyosesis sa Sugbo: “Contemplating the Face of Jesus in the Bible” maoy usa ka dakong panghinaut nga ang matag magtutuo ning atong local nga simbahan ang maningkamot sa paghimop sa Pulong sa Dios ingon nga kabahing esensyal diha sa inadlaw-adlaw nga pagbansay sa atong pagka-Kristohanon. Aron mas konkreto atong anaron ang PAGBASA, PAGTUON, PAGPAMALANDONG, UG PAG-AMPO mga Pulong sa Dios diha sa Balaang Kasulatan.