Kun ikaw sawayon..!

Usa sa labing sayon nga trabaho ning kalibutan mao ang pagpanaway sa ubang tawo, pagpanglibak, pagdaut sa uban. Sa ato pa, alang sa usa ka tsismosa o tsismoso, samtang usa kini ka special skill, kay di man ang tanang tawo maayo ini, apan wa kini magkinahanglan og diploma, wa magkinahangan og mga pagtuon, ni pag-research.

Ug mao kini ang gikabalak-an sa uban. Maguol kita kun unsay ikasulti sa atong silingan, sa atong mga kauban sa opisina, ug sa atong kahigalaan kanato, sa higayon nga makabati kitag mga pagdaut sa atong  kaugalingon.

Ang uban intawon mabawog panagang sa mga gipanulti batok kanila, samtang ang uban, di makatog, maguol og maayo. Samtang ang uban usab, ipaka-bali wala lang ang tanan.

Niay gi-text kanato ni Kuya Boy Odilao: “If people talk negatively about you, live in such a way that no one will believe them.”

Sakto kaayo. Kun usa ka ka-maayong tawo, wa kay angayan kagul-an kun unsay mga pagsaway nga imong madunggan batok kanimo. Sa ato pa, di makad’ot kanimo ang bisan unsa nga pagsaway nga imong madunggan, kaylagi, usa ikaw ka matarong nga tawo.

Hinoon, daghan kaayo kanato nga gikublan na ang  mga nawong, di na dutlan og uwaw, ihilam-os lang mga pagsaway, bisag tinuod ang pagsaway. Lain na ni nga sugilanon.

Live in such a way that no one will believe them. Apan bisan pag adunay motuo sa mga pagsaway batok kanimo -  wa kay angayan kabalak-an tungod kay di man tinuod ang mga pagsaway.

Hinuon, niining atong panahon karon, mora mag ordinaryo na kaayo ang mga pagsaway … bisag unsaon natog deny, wa nay motuo kanato… way motuo sa atong pag-deny … sa ato pa, tinuod ang pagsaway.

Sa laktod, ang tanan, mag-agad kun unsa ka ka-matang sa pagkatawo, Dro, kun motuo ba ang katawhan sa mga pagsaway batok kanimo, o dili ba. Mahimo nga motuo sila nga ikaw usa ka dautang tawo, bisag di tinuod, ug mahimo sad nga di sila motuo, nga ikaw dautang tawo, bisag tinuod nga ikaw dautan. Kining tanan, naa ra kanimo, Dro!

To hell with the tsismosas and tsismosos.