Usa ka opisyal sa Malacanang mitug-an nga wala g’yoy nahuna-hunaan nila nga maayong paagi pagpaminus sa presyo sa mga fuel products.
Sa laktud nga pagkasulti, pait! Tiaw mo nga mohapit na P45 ang presyo sa matag litro sa krudo, unya dul-an sa P53 ang gasolina.
Dili kuno posible nga libkason ang pagpatuman sa expanded value added tax kay maalkanse ang kagamhanan sa iyang target income.
Sa gibalik-balik na nako pagsulti, dili kaayo masakitan ang mga opisyal sa kagamhanan kay dili man sila ang nagbayad sa ilang fuel.
Bisan gani ang sakyanan, isyu usab sa kagamhanan. Mao nga makita nimo nga giwaldas-waldas lang ang ubang sakyanan.
Mangutana mo’g ngano? Tan-awa ang ubang sakyanan sa kagamhanan, wala pangmarkahe og “For Official Use Only” ang kilid nga “requirement” man g’yod unta kini sa mga sakyanan sa gobiyerno.
Ang pagamit og “red plate” dili igo kay sayon ra kaayo kini nga tangtangon ug hulipan og lain kun ang sakyanan gamiton sa personal.
Samtang ang mga tag-iya og sakyanan gisakitan na sa kamahal sa presyo sa petroleum products, ang mga sumasakay sa mga public utility vehicles gisakitan sab.
Unsaon nga samtang dugay ra kaayo nga nagmahal ang presyo sa mga palaliton, wala pay usbaw ang atong mga sweldo.
Kanunay ko kining gibalik-balik ang maong isyu kay aron mapukaw ang mga hingatulgon opisyal sa kagamhanan nga gidumala ni Presidente Arroyo.
Angayan unta nga karong panahona mohimo na sila og mga epektibong paagi, dili kay palab-anan pa hinoon sa pagkolekta ang atong mga buhisanan.
Nakabantay tingali mo nga estrikto kaayo ko batok sa mga opisyal sa kagamhanan nga dili magtuman sa ilang kaakuhan kay daku kaayo ang buhis nga akong gibayran.
Sa akong sweldo, ang gobyerno moiban og kapin sa P3,000 ang matag buwan isip withholding tax.
Ang rehestro sa sakyanan gidoble kaniadto pa kay alang kuno sa “road users tax” apan kun duna nay binilyon nga pundo sa maong “trust fund” gastohon lang sa eleksyon.
Nahinumdom pa ba kamo niadtong programa ni Presidente Arroyo kaniadto nga “Kalsada ni Gloria, Alagaan Natin.?”
Gihimo kadto sa nagkaduol na ang eleksyon ug hangtud na sa election period sa 2004 elections. Maayo unta og gigasto ang road users tax sa pagpanindot sa karsada, apan pagpanilhig ra g’yod tawo’y nahimo.
Kun duna may paninguha sa administrasyon ni GMA nga maminus-minosan ang gipas-an karon nga kalisud sa katawhan, kuwang kaayo ug mora lang og salingkapaw.
* * *
Gisundog na usab didto sa dakbayan sa Toledo ang pagpusil ug pagtinguha pagpatay sa mga tawo nga mogawas na gikan sa bilanggoan.
Dunay suspetsadong tulisan nga buot unta nga makaangkon og temporaryong kagawasan – human kini migawas kay nakabutang og pyansa – gipusil.
Swerte gani kay wala mamatay, apan anaa pa sa peligroso nga kahimtang. Sa akong giingon, kadtong mga tinuoray g’yod nga nakahimo’g krimen, ayaw na lang mo’g gawas uy, kay basin mamatay lang mo.
Sa akong bahin, angkonon nako nga malipay g’yod ko sa higayon nga pamusilon kining mga ilado kaayong badlungon sa katilingban – basta klaro g’yod nga kriminal.
Buyno, dili g’yod imposible nga ang isyu sa giingong pagtumaw sa mga vigilantes nga matud pa mga polis, gisakyan kini sa mga kontra sa maong mga priso.
Sama adtong Allan Lapingcao nga maoy giingong naglabay’g granada didto sa usa ka baylehan sa Bitoon, Daanbantayan –natiklo sa miaging hapon.