Maayo sigurong susihon sa mga hingtungdang ahensiya sa kagamhanan kining kalaki sa pipila ka drayber sa taksi diha sa pier area kinsa kusog kaayong mamili og pasahero. Usa ako sa ilang nabiktima human kami mikanaug sa barko sa among pagdunggo sa pantalan kaniadtong Biyernes sa buntag gikan sa dakbayan sa Ozamiz.
Sa among pagpara sa mga taksi, adunay pipila ka drayber nga mobalibad dayon uban sa pag-ingon nga mogarahe na kuno sila. Adunay usa nga mibalidad kay mokaon pa kuno siya. Maayo na lamang kay adunay usa ka drayber misugot dayon sa dihang among giingnan nga magpahatod kami sa Capitol Site.
Hinuon dili lamang ako ang gibalibaran niining maong mga drayber sa taksi. Daghan usab nga mga pasahero ang nagbagutbot tungod sa pagpamalibad niining maong mga drayber.
Apan matud pa nga dili kadto ang tinuod nga rason niining maong mga taksi drayber. Gusto kuno niining maong mga drayber nga pakyawan ang ilang paghatod sa mga pasahero gikan sa pier, ug dili maggamit og meter.
Sa laktod nga pagkasulti, klaro kaayo nga nagpapresyo kining pipila ka abusadong drayber sa taksi diha sa pantalan sa mga pasahero sa barko gikan sa mga silingang probinsiya ug Mindanao.
Klaro kini nga paglapas sa lagda tungod kay usa kini ka pagpangilad sa mga pasahero gikan sa barko kinsa buot mobisita sa dakbayan. Matud pa sa taho nga akong nasagap nga kada adlaw na kini nga gibuhat sa mga abusadong drayber sa taksi diha sa pier area.
Bitaw, angay lamang nga maaksiyonan kini sa mga hingtungdan ahensiya sa kagamhanan. Kinahanglang dakpon kining maong mga abusadong taksi drayber diha sa pier aron nga manubag sila sa ilang hinanggaw nga binuhatan nga pagpangilad sa mga pasahero sa barko.
Kining gibuhat niining pipila ka drayber sa taksi klaro nga makadaot sa imahe sa dakbayan sa Sugbo. Dili malalis nga ilang gibulingbulingan ang maayong imahe sa Sugbo isip sentro sa komersiyo sa Visayas ug Mindanao, ug usa sa nag-unang destinasyon sa turismo sa nasud.
* * *
Nakapahulay ko og pipila ka adlaw gikan sa newsroom sa dihang mibakasyon ko uban sa akong pamilya didto sa lungsod nga akong natawhan sa Tambulig, Zamboanga del Sur. Kini gumikan usab sa gipahigayon didtong reunion sa among banay.
Sa akong pagbiya paingon sa Mindanao, grabe ang ulan dinhi sa dakbayan sa Sugbo tungod sa dautang panahon didto sa Northern Mindanao. Maayo na lamang kay dili baluron ang dagat sa among pagpanaw hinungdan nga hapsay ang paglawig sa barko nga among gisakyan.
Samtang didto kami sa Tambulig, nagsigi ang paglapdos sa dautang panahon dala sa bagyong “Butchoy” nga mikusokuso didto sa Northern Mindanao. Walay adlaw nga dili moulan. Apan maayo na lamang nga dili kaayo kusog ang mga pag-ulan bisan pa man sa kahasol nga dala niini.
Didto sa among lugar, dili problema ang krisis sa bugas nga nasinati sa nasud karon. Wala ko makadungog nga adunay nagmulo sa pagmahal sa mga presyo sa bugas sa merkado.
Tungod siguro kini kay abunda ang among lungsod sa Tambulig sa humay gumikan kay usa kini sa mga nag-unang rice-producing town sa Mindanao. Kini ang hinungdan ngano dili maglisod ang mga lumulupyo didto sa pagpalit og bugas.
Hinuon dili lamang kana. Ang among lungsod usa usab sa mga tinubdan sa kopras dili lamang sa lalawigan sa Zamboanga del Sur kondili sa tibuok isla sa Mindanao.
Ang Tambulig usa sa mga lungsod sa Salug Valley, ang gitawag nga rice granary sa Western Mindanao. Gani ang bugas gikan sa among lungsod moabot man sa kamerkadohan dinhi sa Sugbo.
* * *
Ipadala inyong reaksiyon sa yacilam@yahoo.com