M/T Twin Star
Midangop kanako ang tag-iya og
Si Celso Baterzal, lumulopyo sa barangay Langub, Sta. Fe mireklamo kay ang tagdumala sa M/T Twin Star nagsige lang og saad-saad kanila nga bayran apan wala g’yod.
Ang report sa kapolisan sa Sta. Fe nagtumbok nila ni captain Jamelee Jueley Valandoni ug chief mate Elmo Inapan nga maoy nagdumala sa M/T Twin Star atul sa hitabo.
Maayo gani kay ang sakay sa pumpboat nga sila si Freddie Tibay ug ang 12-anyos niyang anak nga nangisda niadtong higayona, wala mamatay.
Apan maayong pagkabungkag sa pumpboat ni Baterzal nga gigamit sa amahan ug anak.
Nganong nadam-agan man nila ang pumpboat nga hayag na man unta adtong higayona kay alas singko na man sa buntag sigun sa report?
Naguol na kaayo si Baterzal kay ang iyang pumpboat nadam-agan kaniadto pang Pebrero 29, apan hangtud karon wala pa sila kabayri.
Kay pangisda lagi ang panginabuhi sa mga lumulopyo sa kaislahan diha sa Bantayan, ang mohapit tulo na ka buwan nga walay “income” sakit kaayo alang ni Baterzal.
Makiangayon baya ang awhag ni Baterzal nga ang bayran sa tagdumala sa M/T Twin Star mao lang ang gastohan sa pagpabuhat og pumpboat ingon man sa ilang kagamitan sa panagat.
Akong gitan-aw ang gastohan nga gipresentar ni Baterzal ug maoy pabayran nila sa shipping company nga miabot lang kini og kapin sa P70,000 nga makiangayon kaayo ang kantidad.
* * *
Kun ibaligya sa pamilyang Carungay ngadto sa kagamhanan ang lote nga ilang gipanag-iya atubangan sa Foodland diha sa Banilad aron gamiton sa pagpalapad sa karsada, dili maayong tugotan sila nga makagamit ilawom unya sa flyover isip ilang parking area.
Kun itugot kini sa kagamhanan, sa City Traffic Operations Management, kwestyonable kini kaayo. Ngilngiga no, tabla ra sila’g nakagordo sa sweepstakes.
Tiaw mo bayran ang ilang yuta sa gobiyerno aron gamiton sa “road expansion” unya hatagan pa g’yod sila’g luna nga magamit isip parking area sa ilang mga customers.
Lain pa’y ato, kinahanglang paspasan g’yod tinuod sa DPWH ang pagpaninguha nga mapalapdan dayon ang karsada kilid sa gitukod nga flyover.
Kini aron mahuman ang proyekto sa dili pa ang Hulyo 31 ingon man dili maapektohan pag-ayo ang mga tinun-an nga moagi sa maong dapit inigbukas na sa klase karong Hunyo.
Gitataw sa kadagkoan sa WT Construction nga maoy nagtukod sa flyover project nga kun walay road expansion nga mapahigayon, walay sakyanan nga makaagi diha dapit sa flyover kay sirad-an man nila ang dapit alang sa dugang gimbuhaton.
* * *
Nakakatawa ko nga naminaw sa balita nga gisuportahan kuno sa grupo nga “Crusade Against Violence” ang pagpamatay sa mga gihulagway nga dautang elemento sa katilingban.
He! He! He! Dili ba diay kini maisip man nga “violence” ang pagpamatay nga giingong gihimo sa mga tawo nga mora’g vigilante?
Buyno, ako hinoon kuwang usab og kalooy kun dunay mga tawo nga pamatyon kun sila nakahimo og binuang. Kadtong maapil sa atake wala sila’y swerte kay nganong nakig-uban-uban man sila sa maong mga tawo?
- Latest
- Trending
