Mao kini ang paghulagway sa usa ka driver og PUJ mahitungod sa mga dispatser nga anaa magposte sa Highway Mandaue. Sa akong pagsabot sa iyang text, maila nga nahasol gayod pag-ayo ang PUJ driver sa gibuhat sa maong mga dispatser.
Ang iyang text nagkanayon: "Sir, kana bang mga dispatcher sa Highway Mandaue duol sa Jollibee, wa lagi pangdakpa. Grabe ra ba ka bagsik! Wa na koy ika-remit kay tag P20 man ang pangayoon. Kun way moaksiyon aning mga dispatcher, hain na man diay ang atong balaod nga makapanalipod sa among kabos nga panginabuhi. Gamay ra intawon ang among kita sa among pamilya." -- 0921-5813624 (Sent: 02:47:35pm--January 21, 2008)
* * *
Klarong extortion ang gihimo sa maong mga dispatser. Angay unta silang dakpon kay dili na gyod maayo ang ilang gibuhat. Sangpiton ta ang atensiyon sa kapolisan sa Mandaue City. Wala ba diay kamoy mahimo batok sa maong mga dispatser?
* * *
"Good day, Sir. Saksi ko kun unsa kakusog ang pagbaligya og shabu sa Tutay, Pinamungajan, Cebu. Kadtong nagpaila nimo nga si MIB kunohay sa TUPINCE usa na sa nabuang og suyop." -- 0927-9356674 (Sent: 01:19:11pm--January 19, 2008)
* * *
Mao diay nga defense to the max siya sa pasangil nga daghang namaligyag ginadiling drugas diha sa Tutay kay usa man diay siya sa nakapahimulos niini. Attention, mga barangay opisyal sa Tutay! Paghimo mog lakang batok sa drugas, uy!
* * *
"Kanang drugs sa Tutay, Pinamungajan adto na isumbong sa NBI or sa PDEA-7. Positive na kana. Naa na gani sa karsada atbang sa eskuylahan. Maayong subayon nang lugara kay daghang nag-sale og shabu diha. Ipa-surveillance na sa PDEA-7. Kanang mga driver sa habal-habal kahibalo na sila." -- 0920-2869222 (Sent: 11:36:56pm--January 22, 2008)
* * *
Makapaalarma ang kasayoran nga gipadangat sa atong texter. Uyon ko sa iyang sugyot nga i-refer kini ngadto sa taga NBI o ba kaha sa PDEA-7. Hinaot unta nga maresolbar na kini.
(Sumbong ug reklamo? Text sa 0910-8105522).