Kining gipakita karong mga kalihokan sa administrasyong Arroyo, daw timailhan naman kini nga nagkaratolratol na ang atong gobyerno. Ang usa ka tawo nga maratol, dili na makapaminsar og maayo.
Tungod niini sayop na ang mga pamagi nga iyang gamiton diha sa paghimo sa bisan unsay iyang buhaton. Tungod tingale kay ang iyang kasingkasing naghambin na og kahadlok nga tulisokon siya sa mga tawo kun unsa man ang moresulta gikan sa iyang gibuhat.
Kining maong sitwasyon daw dili na nato malimod nga naa na ug biktima na niini ang administrasyong Arroyo. Ato lang kuhaon nga usa ka ehemplo kining pamaagi sa pag apod-apod sa baratong bugas sa NFA ngadto sa atong mga kaigsoonang mga kabus.
Kining ilang pagpalinya o pila sa mga tawo ug taas kaayo nga pila, paantoson ug pila ka oras nga ma pagba sa kainit sa adlaw aron makapalti og usa ka kilong bugas; buluhaton ba kini sa usa ka gobyerno nga kusog kaayo mopagarpar nga nagmahal sa mga tawo ug naninguha alang sa kalamboan niini.
Dili kini nato mapaabot nga buhaton sa usa ka tawo nga naa pa sa husto nga pangisip. Ang husto nga buhaton sa gobyerno aron dili maglisodlisod ang mga tawo paglinya kada adlaw tugotan ang kada pamilya pagpalit og bugas nga makatubag sa panginahanglan sa usa ba ka semana. Sa ingon nga paagi dili na motaas pa ang pila sa mga tawo nga gusto mopalit og barato nga bugas sa NFA.
Kini nga paagi mahunahunaan lang sa usa ka tawo nga wala pay mga butang nga naghasol sa iyang tanlag. Kini man mga kahasol sa tanlag sa usa ka tawo mao ang maka usab sa dagan sa iyang pangisip aron mahimo na nga sayon ang desisyon nga mahimo. Ug dinhi moingon dayon kita nga ang tawo naratol na.
Tungod niini mahibulong kita ug makapangutana kita, nganong maratol man kining atong administrasyon karon? Duna ba silay gikahadlokan karon? Unsa man?
Ning tungora daghan kaayo ang mga ideya nga moturok sa atong mga hunahuna nga mao ang nakaratol sa Arroyo administrasyon.
Nahadlok na usab ang Presidente tungod kay ang matuod nga isyu sa bugas nahibaw-an na man sa mga tawo ug maundang na ang pagsige og hisgot niini ug sa ingon, ibalik na usab sa taga media ang paghisgot sa mga isyu sa kahiwian nga nabuhat sa administrasyon sama sa ZTE-NBN broadband scandal, ang hello Garci nga tape, o ang fertilizer scam ug uban pa.
Ang natural god nga reaksiyon sa usa ka tawo nga may kasal-anan, maratol man dayon kun duna nay mosugod paghisgot sa iyang mga sala. Ug mao na kini ang nahitabo sa atong gobiyerno karon.