Sa kataposan, giratipikahan na gayud sa Kongreso ang gitawag nga cheaper medicine bill kaniadtong miaging semana. Ang maong balaudnon nagtinguha pagpaubos sa presyo sa tambal aron sayon na lamang kining makab-ot sa mga Pinoy, ilabina na niadtong mga pobre.
Ang napasar nga balaudnon nagtugot usab sa importasyon sa mga patented nga mga tambal. Ug nagtinguha usab kini og rebisyon sa Intellectual Property Code sa mga tambal.
Ang cheaper medicine bill gipasaka ni Cebu first district Rep. Eduardo Gullas sa Ubos Balay Balauranan kaniadto pang 13th Congress. Apan tungod sa daghang tunok sa agianan niini, wala gayud kini makalahutay hangtod nga naulahi kini sa mga priority bills sa Kongreso.
Karon nga napasar na kini sa Ubos Balay Balauranan ug sa Senado, dili layo nga mahimo na gayud kini nga balaud karong pipila ka adlaw. Gani mismo si Gullas ang nagkanayon nga gipaabot nga pirmahan ni Presidente Gloria Macapagal-Arroyo ang cheaper medicine bill karong unang semana sa Mayo.
Hinuon manghinaut lamang kitang ania sa labing ubos nga sektor sa katilingban nga mahimo na gayong balaud ang cheaper medicine bill sa dili madugay. Kini tungod kay dako kaayo kini og ikatabang kanato batok sa nagkalainlaing balatian niining panahon sa tumang kalisod.
Niining panahon nga ang Pilipinas gihapak sa nagkadaiyang krisis, ang ratipikasyon sa Kongreso sa cheaper medicine bill usa ka maayong balita alang sa mga Pinoy, ilabina kanatong mga pordoy kinsa maoy unang mabulahan niini sa panahon nga mahimo na kining balaud.
Sa mga katuigan nga nanglabay, maoy unang problema sa mga pobre ang pagkab-ot og baratohong tambal. Dili ikalimod sa kagamhanan nga ang grabe ka mahal sa presyo sa mga tambal karong panahona maoy naghatag kanila og labad sa ulo sa ilang matag adlaw nga kumbati batok sa nagkalainlaing balatian.
Kini gumikan lagi sa kakulang nila og pinansiyal nga gahin alang sa panginahanglanong tambal tungod kay mas prayoridad nila ang pagpangita og pagkaon alang sa ilang pamilya.
Apan nagresulta hinuon kini sa pagkamatay sa liboan ka mga Pinoy matag tuig tungod sa ilang kapakyas pagkab-ot sa maayong tambal alang sa ilang sakit tungod sa ka mahal niini. Apan niining pagpasar sa cheaper medicine act, mahimong sayon na unya alang sa ordinaryong mga Pinoy ang pagkab-ot og tambal alang sa ilang balatian sa rason nga mokubos na ang presyo niini.
Hinuon ang cheaper medicine bill dugay ra untang nahimong balaud kun wala pa unta kini makasagubang og dagkong mga balud paglawig niini sa Ubos Balay Balauranan. Daghan ang misupak niini, ilabina niadtong mga dagkong pharmaceutical company, gumikan kay maghatag kuno kini og dili maayong epekto ngadto sa industriya pagpamuhat og tambal.
Apan gumikan sa ka importante sa cheaper medicine bill ug sa iyang nakitang rason nga aduna kini dakong tsansa nga mapasar, wala nagduhaduha si Kongressman Gullas pagsang-at pag-usab sa maong bill sa unang adlaw sa 14th Congress kaniadtong Hulyo 2 sa niaging tuig.
Karon, hayag kaayo ang kahigayonan nga mahimo na gayud nga balaud ang cheaper medicine bill tungod kay sa kataposan giratipikahan na kini sa Senado ug Ubos Balay Balauranan. Ug pirma na lamang ni Presidente Arroyo ang kulang niini aron mahimo kini nga balaud nga mao unya ang sandigan niadtong mga walay kaya pagkab-ot sa mahalong mga tambal.
Taliwala sa mga problema nga atong nasinati karon sama sa grabe nga pagsaka sa presyo sa lana ug pagnihit sa suplay sa bugas sa nasud, usa ka gasa ang ratipikasyon sa cheaper medicine bill gikan sa Kongreso ngadto sa mga Pinoy, ilabina niadtong mga pobre sa katilingban.
* * *
Ipadala inyong reaksyon sa yacilam@yahoo.com