Ang labing lig-on nga kahoy

Mi-text kanato pag-usab si Kuya Boy Odilao. Actually, sige ang among contact with Kuya Boy tungod sa kalihokan sa Afrena 7. Mao nga matag karon ug unya, magsinukliay mig text messages. Ug kun duna siyay masindolan nga mga nindot kaayo nga passages, iya kining ipaambit kanato.

Ania: “The strongest tree in the forest is not the one that is protected from the storm and hidden from the sun. It’s the one that stands in the open where it is compelled to struggle for its existence against the wind, the rain, and the scorching heat of the sun. Let’s be thankful therefore, for the life’s challenges that made us strong.”

Nindot kaayo, ug tinuod pa gyud. Kining atong mga kalisud, mga pagsulay sa kinabuhi, mga pag-antus, mga kakulian, mga gumonhap ug tanghaga – sa higayon nga kini atong mabuntog, sama sa kahoy sa kalasangan nga na-exposed sa kainit, kabugnaw, ug pagkusokuso sa dautang panahon, makapalig-on kanato ug makahatag og dugang kaisog pag-atubang sa mga katalagman nga sa matag karon ug unya mohagwa kanato.

Ang kasaysayan sa tawo, puno sa mga sugilanon bahin sa mga tawo nga milampos sa kinabuhi gumikan sa pakigbisog. Daghan sa ato karong mga malampuson nga tawo, dinhi sa atong nasud, ug sa ubang dapit sa kalibutan, nga ilang naangkon ang kadaugan gumikan   sa ilang mga pag-antus.

Mao nga, Dro, ayaw himoang babag ang imong kakabus ug mga kakulian sa kinabuhi pagkab-ut sa kalampusan.

Mipadayon si Kuya Boy: Never stop to do good until the good becomes better, and better becomes best. For the fruits of tomorrow are the seeds of today.

Mao ni ang giingon nga kun unsa man ang imong itanom, mao usab ang imong anihon. Ang good nga nahimong better ug nahimong best nga imong gitisok, mao usab unya ang mga bunga nga imong anihon ugma.

Ang kasaysayan nagtug-an kanato nga sa paglugdang na sa tanan, atong nakita unsa ang mga giani niadtong mga tawo nga sa ilang panahon, pulos dautan ang gitanom!

Daghang mga gamhanan sa kalibutan nga walay hinungdan ang pagkatapus sa ilang kinabuhi, despite sa gahom, bahandi, ug kalibutanong dungog nga ilang naangkon.

Yes, Dro, ang tanan aduna gyuy katapusan.