Giangkon sa mga mamaligya-ay og bugas nga nidagsa ang commercial rice karon diha sa kamerkaduhan. Ug tungod kay mas taas ang suplay, mas mi-ubos ang presyo sa bugas sa mga tindahan. Mas klaro na hinuon nga wa gyuy krisis sa bugas apan aduna lay krisis sa presyo sa NFA rice. Sa pagkakaron, padayon ang paglinya sa mga kabus nga Pilipino nga nangindahay nga makapalit og mas baratong bugas human sa pipila ka oras nga paglinya ilawom sa init sa adlaw o bunok sa uwan. Human ang pipila ka semana nga pagtuki sa usa ka makalilisang nga problema sa pagkaon, karon ingon og sa nadawat na sa publiko ang problema ug nakapangita na og mga solusyon nga pwedeng makapahupay sa kabalaka.
Sa unang pagbuto palang sa problema sa pagkaon, gidudahan sa publiko nga duwa lang ang tanan sa gobyerno aron lang mabalhin ang atensyon gikan sa kontrobersyal nga ZTE NBN deal ngadto sa mas bug-at nga problema sa bugas. Nigawas pa nga drama lang tanan sa administrasyong Arroyo ang tanan aron makagahin og mas dakong salapi alang sa programa sa pagkaon nga giingong pwedeng magamit sa umaabot nga piniliay sa 2010. Ang tanan, naputos sa pagduda ug wa’y kasigurohan kung nagsulti ba sa tinuod ang gobyerno mahitungod sa estado sa pagkaon sa nasud.
Karon, ZTE napud!. Kini ang panawagan sa ubang sektor nga wa’ pa makontento sa imbestigasyon sa senado kabahin sa matod pa, binilyon ka pesos nga transaksyon kung diin mga dagkong ulo sa administrasyon ang nakasapi. Di’ angayan nga kalimtan ang maong kontrobersiya nga ni-akusar sa administrasyon ug mga kaalyado ini nga nakabulsa og dakong kantidad gikan sa binilyon ka pesos nga proyekto tali sa China. Ang nakapait, hinay-hinay nang gitabunan sa panahon ug gipapas sa mga bag-ong problema kung diin ang tiyan sa mga tawo ang nalambigit, ang gisaw-an sa katawhan. Tungod ini, hinay-hinay nang nakalingkawas ang adminitrasyong Arroyo sa usa ka iskandalo nga pwedeng moduso sa publiko sa kadalanan aron ipanawagan ang pagpakanaog sa pwesto sa presidente.
Kung aduna may butang nga hanas o sagad nang gibuhat ning gobyernoha, kana mao ang pagkalimot sa mga kasaypanan nga ilang nahimo ug pagpapas sa mga isyung ilang gisangitan. Ug kung aduna may dakong sayop ang publiko aning tanan, kana mao ang pagdawat sa unsay bag-ong pakulo sa administrasyon ug pagkalimot sa mga tawo nga nakabuhat og dakong kasaypanan sa atong nasud. Sa makadaghang higayon, nigawas nga walay kapaingnan ang mga paningkamot sa pagpapas sa korapsyon ug kahiwian sa gobyerno tungod kay mismong mga tawo wa’y baruganan ug prinsipyo sa pakig-kombati aron makab-ot ang hustisya ug wa’y kaisog nga maningil og silot alang sa mga opisyal nga mapamatud-ang nakalapas sa unsay tukma ug angay sa usa ka opisyal.
Makapahugno paminawon nga adunay uban nga mas gipili pang kalimtan ang mga kontrobersiyang gisangitan sa mga impluwensyadong tawo sa gobyerno tungod sa kabalaka nga maapektuhan ang giingong maayong dungog sa nasud sa uban nga mga nasud ug maapektuhan ang pagbubo og puhunan dinhi sa mga dagkong negosyante sa kalibutan. Nakalimot ba ta nga nisulbong ang ekonomiya sa Hong Kong ug Singapore tungod sa ilang paningkamot batok sa korapsyon ug ang ilang bukas nga pagsilot sa mga tawo nga nalambigit sa korapsyon. Tungod sa gipakitang ngipon sa maong mga nasud, kini ang ilang nahimong puhunan aron sa pagdani sa mga magpapatigayon sa di’ lang pagbubo sa ilang salapi apan pagbuhos usab sa ilang pagsalig sa ilang ekonomiya. Dinhi sa Pilipinas, bali ug lisud sukdon ang prinsipyo sa mga tawo. Mas moangay pa ta nga itago ang mga isyu inay ibutyag sa publiko aron ipamatuod nga seryoso ang kampanya sa gobyerno batok sa mga tikasan ug kawatan.
Apan kinsa may mobarug ug mangisog aron pagsumpo sa mga kawatan sa gobyerno kung mismong mga tawo sa administrasyon ang nalambigit sa mga dagkong kontrobersiya sa pagpangilkil ug kahiwian. Mag-unsa ang mga saad ni presidente Arroyo nga panahon na aron masumpo ang mga hiwing binuhatan sa mga opisyal sa gobyerno kung mismong mga tawo nga nagpalibot kaniya maoy nalambigit sa isyu. Panahon na aron tukion pagbalik ang ZTE ug hatagan og linaw ang huna-huna sa katawhan nga padayong nagduda sa dagan ning kasamtangang administrasyon.